Kalaallisut biibili nutaaq
Suliaq ukiuni 20-ni ingerlataq naammassineqarpoq, biibililu nutaaq tamanut saqqummiunneqarluni. Ilisimatusarfimmi lektor,phd. Flemming Nielsen atuakkanik hebræerisut allanneqarsimasunik marlunnik nutsereqataasimavoq
Biibiliuteqatigiiffiup Biibili nutaamik nutsigaq martsip 20-ani saqqummiuppaa, oqaatsit ulluinnarni atortakkavut, eqqortumik atorlugit nutserneqarsimavoq nipituumillu atuffassisutissaqqilluni.
Ukiut 20-t matuma siorna sulineq aallartinneqarpoq, ukiuni kingullerni lektori Flemming Nielsen suleqataasimalluni.
Ilisimatusarfimmi ukiuni aqqaneq-marlunni sulisimasoq
- Suliaq soqutiginarluinnarsimavoq, hebræerisut pisinnaasakka Kalaallit Nunaanni atorpiarneq ajukkakka misiligaqqippakka, atuakkioqataasoq 2008-mili Ilisimatusarfimmi sulisimasoq oqaluttuarpoq.
Taassuma nassuiaatigaa Testamentitoqaq atuakkanit mikisunit angisuunillu tunngaveqartoq, atuakkallu hebræerisut allassimasut angisooq mikisorlu danskisuunngortillugit nutsersimavai. Tassaasut Ezekiarsip atuakkiaa Hoseassillu atuakkiaa.
- Nutsikkakka naammassimmata atuartartoq biibilimik nutartereqataasussamut nutsikkanillu aaqqissuisussamut saqqummiunneqarput. Teologiugaannimi biibilimi oqaatsit atorneqartut avaqqukkuminaassinnaammata, taanna nassuerpoq.
Isummersueqataasarneq
- Biibilip nutaap oqaatsit aallaqqaammut atorneqarsimasut sapinngisamik allanngortinnaveersaarlugit nutserneqarnissaa anguniarlugu sulisunut allanut suleqataasarlungalu isummersueqataasarsimavunga, lektori oqarpoq.
Oqaatsinut pikkorissuuvit?
- Aap ilaana. Københavns Universitetimi teologiimik ilinniagaqarsimasunga ilisimassavat. Tassa piumasaqaataavoq latinerisut, grækerisut hebræerisullu atuarsinnaassasugut. Taamaammaat hebræerisut atuarlunga aallartippunga, taanna nassuiaavoq.
Kalaallisummi oqaatsit?
- Kalaallisut oqaatsit nalunarnerpaat ilagimmassuk qularutissaanngilaq. Hebræerisoorneq tassunga sanilliullugu suunngilaq. Kalaallisut atuarsinnaallungalu allassinnaavunga. Nassuerutigissavarali kalaallisut oqalunniarneq ajornartorsiutigisinnaangakku, lektori Inatsisartunut kingullermik qinersisoqarmat Suleqatigiissitsisut sinnerlugit qinigassanngortissimasoq nassuerpoq.
Biibili nutaaq Biibiliuteqatigiiffimmeersoq netsikkut atuarneqarsinnaasutut atuffassutitullu saqqummiunneqarpoq. Biibilip suliarineqarneranut inuit 500-nit amerlanerusut peqataasimapput.
Guuti oqaatsit atortakkavut atorlugit oqaluttartoq
Biibiliuteqatigiiffimmi allatsi Birgitte Stoklund Larsen tusagassiorfinnut nalunaaruteqarnermi oqarpoq:
- Biibilimi oqaluttuarineqartut kulturitsinni tunngaviusumik oqaluttuaaapput. Soorunami pissarsiarineqarsinnaassapput, inunnit nutaaliaasunit atuarneqarsinnaallutillu paasineqarniassammata , aamma suli atorsinnaasutut misigineqarniassammata. Biibilimi 2020-meersumi Guuti danskisut oqaluppoq. Guuti taamaaliorsinnaangami? Soorunami. Guuti oqaatsit atortakkavut atorlugit oqaluttarpoq.