Kalaallip meeqqanut atuakkiaa Ruslandimi saqqummersinneqartoq

Lana Hansenip sila pillugu meeqqanut atuakkiaa Sila 2009-mi saqqummiunneqarpoq, atuagarlu kalaallisut, danskisut, franskisut, tuluttut, inuktitut aamma norsk-samitut saqqummiunneqarsimavoq.

Atuagaq maanna Moskvami naqiterneqartussanngorpoq. Tassungalu atatillugu atuakkiortoq septembarip qaammataata naanerani Ruslandimut qaaqquneqarsimavoq.

- Danmarkimi Ruslandip ambassadeqarfianit Ruslandimut qaaqquneqarsimavunga. Nunamit atuakkat arlallit pisiarineqarsimapput, atuakkat russinit Danmarkimi ilinniagaqartunit aamma atuarneqarsinnaassapput, atuakkiortoq eqqumiitsuliortorlu Lana Hansen nuannaaqisoq Sermitsiaq:AG-mut oqarpoq.

Atuagaq kalaallisuumiit toqqaannartumik nutserneqarsimasoq

Lana Hansenip atuakkiani Sila kalaallisuumiit toqqaannartumik russitut toqqaannartumik nutserneqarsimanera tupaallaatigisimavaa.

- Ruslandimi atuakkiannut aaqqissuisumma Eleena Dorofeevap atuakkap pappiliartai uannut nassiukkamigit ilisimatitsissutigaa, russit katillugit qulit kalaallisut paasisinnaallutillu oqalussinnaasut. Atuagarlu kalaallisuumiit toqqaannartumik russitut nutserneqarsimasoq assut nuannerpoq. Nutserisimasoq russiuvoq, Lana Hansen oqarpoq.

Atuakkiorsimasoq atuakkap saqqummiunneqarneranut atatillugu Danmarkimi russit ambassadqarfianut qaaqquneqarsimavoq. Silalu pillugu oqaluttualiaq ukioq manna kingusinnerusukkut russinut saqqummiunneqartussanngorpat Ruslandimut qaaqquneqarsimalluni.

- Russit nuannarinninnerat tupaallaatigisimavara, Lana Hansen illarluni oqarpoq.

Atuakkami pineqarput pinngortitap mingutsitsisoqarneranit, nunarsuarmi silaannaap kissakkiartorneranit tamatumalu kinguneranit annaanneqarnissaa. Sila Kitaani Avannaamiut Siunnersuisoqatigiivisa meeqqanut inuusuttunullu atuakkianut nersornaasiuttagaannik nersornaaserneqarnissamut 2010-mi innersuunneqarsimavoq.