Qaqqami ajutoorneq, sulinermi ajutoorneq imaluunniit aqqusinikkut angallannermi ajutoorneq.

Nalunngiliuk ikiueqqaarnermi qanoq iliussanerlutit - immaqalu inuup inuuneranik annaassillutit?

Amerlasuut naaggaassagunarput.

Ilisimasaq pingaarutilik

Ikiueqqaarnermilli ilinniarsimaneq iluaqutaalluartuusoq ilaatigut Johan Høeg Hansenip nalinngilaa. Taanna siusinnerusukkut Afghanistanimi sakkutuujusimavoq aammalu Qasuitsup Kommuniani upalungaarsimanermut pisortaasimalluni.

Johan Høeh Hansen Danmarkimi Skivemi Falckimit nersornaanerneqarpoq, ullumikkullu tassani najugaqarpoq piffissap ilaani qatserisartuullunilu holdlederiulluni.

Periartaartoq

Nersornaaserneqarneranut pissutaavoq siorna Johan Høeg Hansen sulinani aqqusinikkut ajutoortoqarmat erninilu Dean peritaarsimagamik. Knallertertoq ajutoorsimavoq uppatimigullu aanaartorujussuulluni. Johanip unngersani peerpaa uppataanullu sukallugu qilerullugu aanaarnera unitsinniarlugu, 112-imullu qalerrisaarilluni.

Inuunera annaappaa

Taamatut periataarnera pissutaalluni ajoqusertoq napparsimmaviliaanneqarpoq inuuneralu annaanneqarluni.

– Asserseuutissaalluarpoq ajutoornermi ajoqusertoqartillugu iliuuseqarsinnaaneq qanoq pingaaruteqartigisoq. Johan iliuuseqarnerermigut qularnanngitsumik ajoqusertup inuunera annaappaa, qatserisartoq Kenneth Eriksen Vejle Amts Folkebladimut oqaluttuarpoq.

Ilikkaruminartoq

Sermitsiaq.AG-p saaffigimmani Johan Høeg Hansenip nersorniarneqarnini persuarsiutiginianngilaa. Kissaatiginartippaa ikiueqqaarnermik ilinniarnissap pingaaruteqassusiata sammineqarnissaa, ilisimasallu tamakkua sungiusarluartarlugit.

– Ikiueqqaarneq inuit ilinniartariaqaraluarpaat. Tamanna assigiinngisitsisinnaasorujussuuvoq, Johan Høeg Hansen erseqqissaavoq.