Københavnimi toqusoq
Kalaallinut Danmarkimiittunut pensionaati
Angutip angerlarsimaffeqanngitsup kalaallinillu kingoqqisup ataasinngornermi alianartumik toqukkut qimagutereerneratigut, Rådet for Sociale Udsatte maanna kissaateqarpoq kalaallit ajornartorsiuteqartut ukkatarineqarnerunissaannut
Angutip 32-nik ukiullip angerlarsimaffeqanngitsup kalaallinillu kingoqqisuusup, Københavnimi Amagerbromi toqunerata kingorna, Rådet for Sociale Udsatte-mi ilaasortap kalaallit ajornartorsiuteqarlutik Danmarkimut nuuttartut ukkatarineqarnerunissaat kissaatigaa.
- Kalaallit amerlavallaartut Danmarkimut nuunnerminni inuunerissaarnissaminut suli piumassuseqarneranni ikiorneqarnissaminnut neqeroorfigineqartanngillat. Kingoqqutsinnginnermi inuttut aningaasatigullu imminut akilersinnaanerungaluarpoq.
Mille Schiermacher, Danmarkimi Rådet for Sociale Udsatte-mi ilaasortaq oqarpoq.
Atuaruk: Isumalioqatigiisitaq: Inuuniarnermikkut ajornartorsiutillit ikiorluarneqarnerussapput
Ataasinngormat alianartumik pisoqarnerani angut kalaallinit kingoqqisoq angerlarsimaffeqanngitsoq ambulancenut pingasoriarluni sianertoqareeraluartoq toqukkut qimaguppoq. Taamaammat Mille Schiermacherip kissaatigaa kalaallit inuusuttut nunatsinniit Danmarkimut nuuttartut sammineqarnerunissaat.
- Isumaqarpunga eqqartortariaqaripput qallunaat qanoq aaqqissuussaasimanersut inunnut taakkununngarpiaq tigusinissaminnut. Aamma nuuttartut ajattugaannginnissaat qanoq pinaveersaartissinnaaneripput eqqartortariaqarparput, Mille Schiermacher oqarpoq, nangillunilu:
Atuaruk: Angut 32-nik ukiulik Københavnimi toqusoq
- Kalaallit inuusuttut Danmarkimut nuuttartut akornanni pitsaaliuinermut suliniutinik amigaateqarpugut. Amerlavallaaqaat angerlarsimaffeeruttartut aammalu atornerluinermut angerlarsimaffeqannginnermut ikaarsaartartut. Rådet for Sociale Udsatte-mit taamaammat siunnersuuteqarnikuuvugut kalaallinut pensionatimik pilersitsisoqassasoq. Tassani utaqqiisaangallartumik angerlarsimaffeqartoqarsinnaavoq siunnersuisoqarsinnaallunilu qanoq iliorluni inissamik nassaartoqarsinnaanersoq. Taamaaliornikkut arlallit angerlarsimaffeqanngitsutut inuunissaat pinngitsoortinneqarsinnaavoq.
Rådet for Sociale Udsatte 2014-mut ukiumoortumik nalunaaruteqarnerminni kalaallit ajornartorsiuteqartut iliuuseqarfigineqarnissaannut sisaminik innersuussaqarnikuupput.
Atuaruk: Tusagassiorfik: Immiussani tusaaneqarsinnaavoq kinaassusersiortoqarsimanngitsoq
Aajukualu innersuussutigineqartut:
- Siunnersutigineqarpoq kalaallit ajornartorsiuteqarlutik Danmarkimut nuttartut servicelovi malillugu tikilluaqqussummik sullinneqartarnissaat.
- Siunnersuutigineqarpoq kalaallinut tikerlaanut pisortanillu ikiorneqarnissaminnut pisariaqartitsisunut Danmarkimi pensionatimik pilersitsisoqassasoq.
- Siunnersuutigineqarpoq inunnik isumaginninnikkut katsorsarneqarnissamullu tunngasuni kulturikkut tunuliaquttat oqaatsitigullu piginnaasat najoqqutaralugit neqeroortoqartassasoq.
- Siunnersuutigineqarpoq kalaallinut ajornartorsiuteqartunut Kalaallillu Nunaannut uterusuttunut siunnersuinernut, tapersuinernut aningaasatigullu ikiorsiinermut immikkut aningaasaliisoqassasoq, Kalaallit Nunaannut ajunngitsumik uteqqinnissaat siunertaralugu.
Atuaruk: Isiginnittoq: Sanioqquttut angut toquinnartariaqarnerarpaat