Kalaallinik assilisat Nordatlantisk Husimiilersut
Assiliisartup Chris Christophersenip saqqummersitaa 'Grønlands Ansigt' - Kalaallit Nunaata Kiinaa - ingerlaavartumik ineriartorpoq. Ukioq manna saqqummersitsinera Odense pissaaq.
Assiliisartoq qallunaaq-kalaaleq Chris Christophersen, Fynimi peroriartornikoq ukiut arfineq-pingasut matuma siorna assiliinermi suliani ‘Kalaallit Nunaata Kiinaa’ aallartippaa. 2011-mi saqqummersitaa Danmarkimi nunatsinnilu angalaartinneqalerpoq.
Suliaa suli ingerlavoq, maannakkullu Chris Christophersenip 15-issaannik assinik saqqummersitsinissani suli ‘Kalaallit Nunaata Kiinaa’-nik ateqartoq piareerpaa. Saqqummersitami Kitaani, Kujataani Tunumilu angalaarnermini misigisani saqqummiuppai.
Chris Christophersenip anaanaa Kalaallit Nunaanninngaanneerpoq, taamaammat meeraanerminiilli nunatsinnut atassuteqarpoq tamannalu Kalaallit Nunaat pillugu suliaqarnissaminut isumassarsiffigisimavaa.
Chris Christophersen Københavnimi najugaqarpoq taakanilu assiliisutut ingerlalluarnini aallartissimallugu, ilaatigut kunngikkormiut assilisarpai. Kunngikkormiut angalaqatigisimavai – Danmarkimiinnaanngitsoq – nunatsinnut Savalimmiunullu tikeraarmata aamma. Saqqummersitaq aamma taamaalilluni nunatsinneersunik Rosenborg-ilaqutariinnut attaveqarneratigut pissarsiarisimasaanik imaqarpoq. Nunatsinneersut akornanni qaannaasat, assit allagartallu Arveprinsip Knudip erneratalu Grev Christian af Rosenborgip Kalaallit Nunaannut sakkutuut imarsiortut umiartoqatiginerini pisimasaat.
Naak saqqummersitami Kalaallit Nunaat pingaarnertut sammineqaraluartoq Savalimmiunut kunngikkormiut angalaaqatiginerini assilisai aamma saqqummersinneqarput.
Assinik saqqummersitsineq ‘Kalaallit Nunaata Kiinaa’ aqagu sisamanngornermi nalunaaqutaq 16.00 ammarneqassavoq septembarillu 30-ata tungaanut takusarneqarsinnaalluni. Chris Christophersen ammaanersiornermi peqataassavoq nunatsinneersorlu erinarsortartoq Rikka nipilersukkanik aliikkusersissalluni.