Skip to main content

Kalaallini siullersaalluni yogarnermik pissartanngortoq - aamma VM-eqataassaaq

Dansk Yoga Sportsforbundip akunnerup naanerani Danmarkimi yogarnermik Københavnimi pissartanngorniutitsivoq, Tupaarnaq Binzer tassani peqataavoq

Yogami pissartaq yogarnermillu ilitsersuisoq Tupaarnaq Binzer Londonimi - World Championships of Yoga Sports - yogarnermik nunarsuarmi pissartanngorniuttoqarnerani Kalaallit Nunaat sinnerlugu peqataassaaq, taanna maajip 31-ani juunip aappaata tungaanut ingerlanneqassaaq. 

Tupaarnaq Binzer Nuummeersuuvoq, ukiuni marlunni Bikram Yogartartuulluni, 2012-imilu yogarnermik Los Angelesimi ilitsersuisunngorluni. Yogartarneq siullermeerluni qularnartoqartissimagaluarpaa.

- Qatanngutimma yogartunut ilagiumammanga siullermeerlunga misilippara, yogarneq siullermik soqutiginngilara qularnartoqartillugulu. Bikram Yogareeramali tiguartippunga, Tupaarnaq Binzer Sermitsiaq.AG-mut oqarpoq. 

- Minutsini 90-ini sungiusarpugut, 40-nik kiappoq silallu isugutassusaa 40 procentimiilluni. Siullermik yogareernerma kingorna ilitsersuisunngornissara angunialerpara, Tupaarnaq Binzer oqarpoq. Taanna bankimi sulisutut ilinniagaqareerpoq, Copenhagen Business School-imilu erhvervsøkonomimi psykologimilu bacheloritut ilinniagaqarnikuulluni. 

Ilitsersuisunngorusunneq
Kalaaleq yogi (yogartartumik isumaqarpoq) septembarimi 2012-imi Los Angelesiliarpoq Bikram Yogartartutut ilitsersuisunngornissani anguniarlugu. Nunarsuarmi assigiinngitsuneersut inuit 315-it atuaqatigai, ilinniarnerat sakkortuvoq, tassami sungiusarneq sakkortooq yogarnermillu inissisimariaatsit ilinniarmassuk. 

Sapaatip akunneri qulit LA-mippoq. 

Novembarimi 2013-imi Bikram Yogarnermut ilitsersuisalerpoq, Københavnimi Aarhusimilu ilitsersuisarluni. 

- Qaammatit sisamat ilitsersuisareerpunga, misigisarlu suli nuannertupilussuuvoq. Qaammatit amerlavallaanngitsut qaangiupput aperineqarama Danmarkimi pissartanngorniunnermi peqataarusunnersunga, ingerlaannarlu peqataanissamut akuersivunga, Tupaarnaq Binzer oqaluttuarpoq. Arfinilinnik ukiulimmik paneqarpoq, yogarnermillu ilitsersuisumik Adam Kopeckimik atilimmik inooqateqarluni. 

Kalaallini siullersaat
- Yogarnermik unamminermi aatsaat kalaallimik peqataasoqarpoq, nunarsuarmi pissartanngorniunnissanut annguppunga Londonimi maajimi ingerlanneqartussami. Pissangasorujussuuvunga nuannaarutigaaralu Kalaallit Nunaat sinnerlugu unammeqataanissara, Tupaarnaq Binzer oqarpoq. 

- Nuummi Bikram Yogartarfittaarnissara takorloortarpara.

Filmiliaritittartut erinarsortartullu soorlu Beyónce, Lady Gaga, George Clooney kiisalu Bon Jovi aamma Bikram Yogartartuupputtaaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER