video takuuk

Kalaallimik paasisassarsiornissamut peqataasussamik WWF pissarsiorpoq

WWF-ip avatangiisit pillugit ilinniartunut paasissassarsiortitsilluni angalatitsisartui, Students on Ice, kalaallimik peqataasussamik ujaasipput

Umiarsuup Ocean Endavourip qaava

Verdensnaturfondeni ukiut tamaasa ilinniartut 100-t Issittukkut angalatittarpaat, ilisimatuut, eqqumiitsuliortut, atuakkiortut, nipilersortartut aamma ilinniartitsisut peqataatillugit.

Paasisassarsiortitsilluni ilinniartitsineq Students on Icemik taaguuteqarpoq, sapaatip-akunnerinilu makkunani WWF, tassunga angalanissamut peqataanissaminik soqutiginnissinnaasumik kalaallimik ilinniartumik pissarsiorpoq.

Ilikkagaqangaatsiartoq
Sisimiuneersoq Malu Ostermann siorna peqataavoq, angalanerlu sivisuumik puigugassarinngilaa.

- Silap pissusiata allangoriartornera pillugu paasisaqarlurpunga, tamatumalu Issittoq aamma issittumi innuttaasut qanoq ajoquserneraa paasisaqarfigalugu. Saniatigut immitsinnut ataqatigiilluarpugut. Allaannginnami immitsinnut nalunngittuaannarsimasugut. Immaqa soqutigisagut assigeeriarmata, Malu Ostermann taama oqaluttuarpoq, pisinnaasuugunilu umiarsuarmik angalaqataaqqikkusukkaluarpoq.

Kalaallit Nunaanni naammassissasoq
Paasisassarsiortut siullermik Quebecimi Canadami naapissapput, piareersassapput imminnullu ilinniarlutik. Tassanngaanniit Quebecimi Kuujjuarmukartoqassaaq, umiarsuaq Ocean Endeavor tassanngaanniit avalassaaq.

Atuaruk: Issittoq aakkiartortoq inuusuttut ilisimasaqarfiginerulissavaat

Siullermik Canadami nunaqarfiit arlallit, kangerluit aamma Baffin Islandimi sineriak tikeraarneqassapput - ilaatigut Auyuittuq National Park.

Umiarsuullu Davistrædetikkut Nunatsinnut ikaassaaq, Ilulissanullu aamma Itillimut angalasinnarluni, paasisassarsiorneq Kangerlussuarmi naammassineqassaaq.

Uani ataani piviusulersaarut naatsoq Verdensnaturfondenip paasisassarsiorneq pillugu suliarisimasaa takuuk

Powered by Labrador CMS