Skip to main content

Kalaaliaraq amigartoorujussuartoq

Nuummi Kalaaliaraq pisiniarfiusimagaluaruni namminersortoq piginnittoq qangalili uniinnareersimassagunaraluarpoq. Naatsorsuutit ukiuni tulleriiaaginnarni amigartooruteqarfiupput

Nuummi Kalaaliaraq annertujaamik amigartooruteqarfiusumik ingerlanneqarpoq, ingerlanneqarneralu kommunip karsianut taamalu aamma akileraartartunut ukiumut aningaasarpassuarnik akeqartarluni.

Ajornartorsiut paasinarpoq, tassalu aningaasartuutit tunisanit matussuserneqarsinnaasannginnerat, tamannalu qanoq iliuuseqarfigineqartariaqalersoq politikerit kommunip siulersuisuisa kingullermik ataatsimiinneranni pineqartumik oqaluuserinninnerminni isumaqarput.

Politikerit ataatsimiinnermi niuernermik ingerlatap ingerlalluannginneranik saqqummiussivigineqarput, tamatumanilu ilaatigut takutinneqarluni, kalaaliaqqap illoqarfiup qeqqani ammarneraniit ukiuni tamani 2 millioner koruunit missinginik atuivallaartoqarsimasoq.

Aningaasat taakkua pingaartumik sulisut aningaasarsiaqartinneqarnerannut atorneqarsimapput.

Illoqannginnersami inersuaq

Pissutsit ilungersunarput, aaqqiissutissarsiorlunilu piffissami sivitsortumi sulisoqarsimalluni ataatsimiinnerillu arlalissuit ingerlanneqartarsimallutik, ilaatigut kommunimi ingerlatsiviup aamma Nuummi aalisartut piniartullu peqatigiiffiata akornanni.

Ilisimatitsissummi kommunimi politikerinut saqqummiunneqartumi nutaamik aaqqissuussinissaq ingerlatsinermilu iluseq nutaaq kommunimit neriuutigineqartoq atuarneqarsinnaavoq.

- Kalaaliaraq namminersortunngorsarlugu ineriartortinneqartariaqaraluarpoq, aalisartunit piniartunilluunniit ingerlanneqartussanngorlugu, imaluunniit illoqannginnersami inersuartut aalisartut piniartullu nuisitsivinnik nioqqutissat tuniniarneqarfigisinnaasaannik attartorfigisinnaasaattut.

Niuernerpalaarnerusumik ilusiliinissamut atatillugu NAPP-ip isumaqatiginiarneqarnissaa Sanarfinermut Avatangiisinullu Ingerlatsivimmit pingaartilluinnarneqarsimasoq politikerinut ilisimatitsissummi atuarneqarsinnaavoq. Kisianniligooq isumaqatigiittoqarsinnaasimanani.

Nioqqutit nutaat

Kalaaliaraq niuerfittut pitsanngorsarniarlugu assigiinngitsunik arlalinnik suliniuteqartoqareeraluarpoq. Ilaatigut nioqqutigineqartut amerlanerulersinneqarput.

Aalisakkat panertut nikkullu, aalisakkat neqillu qerisut kiisalu tarajortikkat 2014-imi decembarip tungaanut nioqqutigineqarsinnaanerat Namminersorlutik Oqartussanit juulimi immikkut akuersissutigineqarpoq. Kalaaliaraq tamatumunnga atatillugu nillataartitsivinnik igalaarsuartalinnik marlunnik qerititsivinnillu tuniniaanermut atugassanik marlunnik pisisimavoq.

Kalaaliaratoqqap tamatuma peqatigisaanik ulapaarnerpaaffiup nalaani atorneqarsinnaanera periarfissiissutigineqarpoq, assersuutigalugu ukiup qanoq ilinera malillugu tuttunik, umimmannik timmissanillu tuniniaasarnermut atatillugu.

Kommunip aamma NAPP-ip akornanni isumaqatigiinniarnerit ingerlaqqittut politikerinit maanna isumalluutigineqalerput; tassa aaqqiissutissamik kinguneqassasut, kommunillu ingerlatsinermut aningaasartuutai taamaalillutik annikillisinneqassasut. Tamatumani ukiortaami paasinarsisoqarnissaa naatsorsuutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER