Kalaaleq tusilartoq FN-imi oqalugiarpoq
Nunatsinni tusilartut atugaasa naammaginannginnerat oqaluttuarineqarpoq Kalaallit Tusilartut Kattuffianniit Rita Petrussenip FN’imi Nunat inoqqaavisa oqallittarfianni oqalugiarmat
FN’ip nunat inoqqaavinut oqallittarfiani aqqaneq aappassaa ulluni makkunani ataatsimiinnermi isumaginninnermut tunngassuteqartut oqaluuserineqartut ilagaat. Nunat inoqqaavi nunanit assigiinngitsuneersut innarluutillit kattuffii peqatigalugit ataatsimeeqataapput. Nunatsinniit Kalaallit Tusilartut Katuffiat peqataavoq.
Atuaruk: Nunat inoqqaavi FN-mi oqallipput
Kalaallit Tusilartut Kattuffiat sinnerlugu peqataasoq Rita Petrussen ussersorluni oqalugiaamminik ippassaq pingasunngornermi saqqummiussivoq. Tassani ilaatigut eqqartorpai Nunatsinni tusilartut atugaasa pitsaannginnerat.
Atukkat ajorput
- Rita Petrussen-ip katersuunnermi oqaaseqarnermini ajuusaarutigalugu ilisimatitsissutigaa Nunatsinni tusilartut atuarfiata matuneqarsimanerata kinguneranik maanna tusilartut ussersorluni kalaallisut oqaluttunut ilitsersuisussanik amigaateqalersimanerat. Tamatuma kinguneranik ilinniarfissaarussimaneq annertusinerarpaa allaat Danmarkimut ilinniariartorsinnaaneq mattunneqarsimalluni. Ilanngullugit eqqartorpai Nunatsinni tusilartut inuiaqatigiinni peqataanissaminnut teknikkikkut periarfissat killeqassusii, Inuit Issittormiut siunnersuisooqatigiiffiat ICC Tusilartut kattuffiannik FN’ip New Yorkimi illorsuani ataatsimiinnermut ilaserinnittuusoq nalunaarpoq.
ICC’p ilisimatitsinera malillugu aatsaat siullerpaamik ussersorluni nunat inoqqaavisa oqallittarfianni saqqummiisoqarpoq, taamatullu saqqummiisoq siulleq tassaavoq Rita Petrussen.
Tusilartut kattuffianneersut aamma periarfissaqarsimapput innarluutillit kattuffiisa nunanit tamalaaneersut ataatsimiinneranni peqataanissamut. Katersuunnerup qulequtaraa nunat inoqqaavisa innarluutillit pisinnaatitaaffiisa imminnut tunngatillugu aamma atuutsinneqalernissaat anguneqarnissat.