Kalaaleq toqutseriartutut pinngitsaaliisutullu Københavnimi paarnaarussaavoq

Arnaq timersuutigaluni arpattoq orpikkat akornanni ajoqusersimaqisoq, saassutsinnerminit akunnerit qulingiluat qaangiuttut nassaarineqarpoq, taanna Østerbromi Københavnimi Sporsløjfen 10-mi atisai alittorneqarsimallutik pinngitsaalineqarsimavoq.

Angut 29-nik ukiulik kalaaleq pingasunngornermi Dommervagtenimi inatsit tunngaviusoq naapertorlugu killisiorneqareerluni sapaatip-akunnerini sisamani tigummigallagassanngortinneqarpoq, arnamut toqutseriartutut pinngitsaaliisutullu unnerluutigineqarluni.

Atuaruk: Kalaaleq pinngitsaaliisutut toqutseriartutullu Danmarkimi tigusarineqartoq

Marlunngornermi ullaakkut
Arnaq 28-nik ukiulik marlunngornermi ullaakkut arpatsilluni saassunneqarpoq, pinngitsaalisaallunilu arneriffigineqarluni.

Pingasunngornerup unnuaani angut 29-nik ukiulik tigusarineqarpoq, inatsillu tunngaviusoq naapertorlugu killisiorneqarluni.

Pinngitsuunerartoq
Angut toqutseriartutut pinngitsaaliisimasutullu pasineqartoq pinngitsuunerarsimasoq illersuisuata, Niels Anker Rasmussenip killisiuinermi oqaatigaa.

- Sullissara pinngitsuunerartoq ullumikkullu apeqqutinik akisaqarnissaminut kissaateqanngitsoq ilisimatitsissutigisinaavara, illersuisoq oqarpoq.

Tigummigallagassanngortinneqarnerali maalaarutigineqanngilaq.

Niaqqumigut annersinneqartoq
Arnaq 38-nik ukiulik marlunngornermi ullaaralaakkut anigami angerlaqqissimanngilaq.

Politiit unnerluussutaat naapertorlugu, taanna Østerbromi Sporsfløjfen 10-mi orpikkanut igeriunneqarpoq, kiinnamigut niaqqumilu tunuatigut annersarneqarluni.

Pinerluttuliortup aamma taanna qimeriaraluarpaa, allunaasamik ilimagineqarpoq. Tamatuma kinguneranik arnaq niaqqumigut aanaartoorpoq ilisimajunnaarlunilu, unnerluussummi tamanna allaqqavoq.

Ilisimanngitsoq
Taamaaleriarluni taanna pinngitsaalillugu arneriffigineqarpoq, orpikkanilu ilisimanngitsoq qimanneqarluni.

Aatsaat taanna arnaq ajoqusersimaqisoq ualikkut nassaarineqarpoq. Tillernera kigaatsuararsuuvoq, inuuneralu ulorianartorsiorluni, politiit ilisimatitsipput.

Angut taanna pingasunngornermi misissuinerup kingorna pingasunngornerup unnuaani tigusarineqarpoq. Pingasunngornermi ullaaralaakkut pingasup qaangeraa tigusarinninneq pivoq.

/ritzau/