Kalaaleq tilluuttartoq DM-imi unammissaaq
Inuussutissarsiutigalugu tilluuttartoq Frank Madsen Danmarkimi pissartanngorniunnermi unammissaaq.
Frank Madsen oqimaassutsimi weltervægtimi Danmarkimi pissartanngorniunnermi Oliver Møllenbergimut unammissaaq.
Tilluutitsineq Gillelejip timersortarfianiissaaq, tilluunnerillu nalunaaqutaq 14.00 aallartissallutik.
Unamminissamut piareeqqavoq
Frank Madsenip unamminissaminut piareeqqalluni unammisassaminut ima oqarpoq:
- Neriuppunga unamminissamut piareeqqasutit, uanga piareersimalluinnarpunga. Suut takutissinnaaneritit takutikkigit, uanga piareersimalluinnarpunga, knock-out.dk-mut oqarpoq.
Taanna tallimariarluni tilluutereerpoq, suli ajorsartinneqanngilaq. Letlandimiumut unammigami knock-out-imik ajugaavoq kingullermik unammigami.
Toqqaannartumik isiginnaarneqarsinnaavoq
- Franki sukataallaqqissuuvoq, siornatigut kick-bokseriusimanera ersertarpoq, tamanna isiginnaartunit nuannarineqarluartarpoq, Ekstra Bladet unamminissaq sioqqullugu allappoq.
Tilluunnermi unamminerit tamaasa Ekstra Blademit aallakaatinneqassapput. Ekstra Blademi unamminerit aqagu arfininngorpat nalunaaqutaq 14.00-imit takuneqarsinnaapput.