Kalaaleq sakkutooq toqutaasimasoq ataqqiniarneqartoq

Kalaaleq sakkutooq Inuk Larsen Kitsissuarsunneersoq, siorna ukiakkut Timmisartoqarfiup Karupip eqqaanit biilertumit aporneqarluni toqukkut qimaguttoq, sisamanngormat Flyvervåbenimi sakkutuujusimallutik toqukkut qimagussimasut Viborg Domkirkemi eqqaaniarneqarmata eqqaaniarneqartunut ilaavoq.

Eqqaaniaaneq Flyvervåbenip ukiunik 70-inngortorsiorneranut atatillugu ingerlanneqarmat, timmisartortartut palasiat Leif Holmstrøm aallarniillu qinnussivoq, tamannalu pereermat oberstit marluk toqusimasut pillugit flyvervåbenip eqqaassutissaatai kransilerpaat. Flyvervåbenimi pisortaq, generalmajor Anders Rex kransip qalersaanik iluarsiilaariarluni minutsimi ataatsimi nipaallisimasoqarnissaanik qinnuteqarpoq, nipaallisimasoqareermallu toqusimasut sakkutuutut ilassivai.

Danmarkip ilassinninnera kingulleq

Eqqaaniaaneq naggaserlugu Prinsens Musikkorpsikkut ukiakkut silagisseruttortoq ”Danmarks Sidste Honnør” nipilersorlugu atorpaat.

Inuk Larsenip ilaqutai sinnerlugit ajaava Karen Angubesen taassumalu ikinngutaa Johnny Andersen peqataapput. Taakku marluullutik eqqaaniaasoqareermat oqaluffimmi toqusut inaannut iseqquneqarput, tassan sakkutuup Larsenip pisortarisimasaata oberst Palle Mikkelsenip Flyvervåbenit atuagaataa eqqaaniutaasoq taakkununnga takutippaa.

Atuakkamiipput sakkutuut flyvervåbenimi sulinerminni toqusimasut aqqi. Eqqaaniaanermut atatillugu atuagaq qupperneqarsimavoq, L. I. Larsen 2019-imilu sakkutuut allat marluk toqusimasut aqqi nuisillugit.

Flyvevåben puigungaqanngisaannartoq

- Atuakkami timmisatortartutut sakkutuujusimasut Flyvervåben 1950-imili pilersinneqarmat sulinerminni toqusimasut aqqi tamarmik allassimapput. Atuagaq eqqaaniutaasoq Viborg Domkirkemitiinneqarpoq, oqaluffik Flyvervåbenimit oqaluffittut atoneqartarmat. Ukioq kaajallallugu tallimanngornerit tamaasa atuagaq ataasiarlugu qupperneqartarpoq, taamaalilluni ukiup aappaa avillugu ingerlareeraangat atuagaq tamakkerneqartarluni,

Ullumikkorpiaq qupperneq nutaajunerpaaq ammatinneqarpoq, obersti Palle Mikkelsen oqaluttuarpoq, taanna Operation Support Wingimi pisortatut sakkutuumut Larsenimut, sakkuutuni nalinginnaasumik Inuk Larsenimik taaneqartartumut ittuusimavoq.

- Sakkutooq Larsen qimagutereeraluarpoq, Flyvervåbenimilli puigorneqanngisaannassaaq, Mikkelsen oqarpoq.

Flyvervåbenip ullorsiortarnera ingerlaaqatigiilluni takutitsilluni sakkutuullu nipilersortartut tusarnaartitsinerannik nalinginnaasumik ingerlanneqartarpoq, tamatumalu kingorna domkirkemi tusarnaartitsisoqartarluni, ukioq mannali corona pissutigalugu sakkutuuni qullersatut inissisimasut arlalialuit Inuk Larsenillu ilaqutari danskiusut kisimik aaqqissuussamut peqataatinneqarput.

Ilanngutassiap aallartinnerani aaqqissuussinermit assit amerlanerit takukkit.