Kalaaleq nerrivimmi arsaararnermi EM-eqataasoq

Tysklandimi Münchenimi nerrivimmi arsaararnermi europami pissartanngorniuttoqarpoq ulluni makkunani.

Qulingiluariarluni Nunatsinni pissartaasareersoq, 24-nik ukiulik Ivik Nielsen, naggammik ippassaq marlunngornermi unammivoq, tassani sloveniamiumut Deni Kozul-imut 11-6-mik, 11-7-mik aamma 11-4-mik ajorsarluni.

Peqataaneq ilinniutaalluartoq

Europami pissartanngorniunnermut peqataaneq ilinniutaalluartoq Ivik Nielsenip oqaatigaa.

- EM-imut peqataanissannut nunanut allanut unammisartunut sungiusaasup toqqarpaanga apriilimi. Unammisartut pikkorissut unammivakka, tamannalu ilinniutaaqaaq. EM-eqataaninni nuannisarnissara pingaartillugu unammeqataavunga, unammisakkami uannit pitsaanerupput, Sermitsiaq.AG-mut oqaluttuarpoq.

Unamminermi siullermi pissangasoq

EM-imi peqataanermini arfinileriarluni unammivoq. Ataasiakkaarnermi pingasoriarluni unammivoq, iligiiaarluni ataasiaq kiisalu arnat angutillu iligiiaarneranni marloriarluni unammeqataalluni. Arnat angutillu iligiiaarneranni Letlandermiu unammeqatigisani ajugaaqatigaa ataasiarluni.

- Unammersuaarnerni angisuuni peqataqqinnissara neriuutigaara. Una unammersuaarneq peqataaffiginikuusanni annersaavoq. Unammeqqaalerama pissangavunga, unamminermili pitsanngoriartorpunga, tassanilu arnat angutillu iligiiaarneranni unammineruvoq, ajugaallutalu, oqaluttuarpoq.

Nunarsuarmi pissartanngorniuteqataanissaq

Ataasiakkaarluni unamminerni pingasoriarluni unamminermini ajugaanngikkaluarluni takutitani iluarisimaarpai.

- Unammilluartutut imminut nalilerpunga, naatsorsuutaareersimavormi unamminikka ajorsassagikka. Nunarsuarmi pissartanngorniuteqataanissara aappaagu maajimi isumaliutigaarput, taamaattumik unammersuaarnerni angisuuni peqataasalernera nuannareqaara, tamannami meeraallungali takorloortarnikuuara, Ivik Nielsen oqarpoq.

Island Gamesimi Guernsey-mi aappaagu pisussami ajugaanissani siunnertaraa.