Skip to main content

Kalaaleq itsarnisarsiornermik ph.d.-tut ilinniagalik siulleq

Tallimanngormat Mari Hardenbergip inuit sioqqullugit Dorset kulturiannit eqqumiitsulianik ph.d.-mi soraarummeerunni illersorpaa. Ilisimatuutut allaatigisaq Nationalmuseet-imi aamma Københavns Universitetimi Saxo-institut-imi allanneqarsimavoq

Ukiuni kingullerni pingasuni Mari Hardenbergip Dorset-kulturiannit qiperukkat tusintit arlallit misissorsimavai, inuit sioqqullugit eqqumiitsulianik ph.d.-tut soraarummeerutissaminut atatillugu. Ippassarlu ualikkut Københavns Universitetimi allaatigisani saqqummiuppaa, taamaasilluni kalaallini itsarnisarsiornermik ph.d.-tut ilinniagalinni siullersaavoq.
Dorset-kulturi piniartuullutillu katersisartuusimapput, issittup kangiani subarktiskimilu, Canadami Nunatsinnilu, kristusip inunngornissaa sioqqullugu ukioq 800 missaanit kristusip inunngornerata kingorna ukioq 1300 missaanut, najugaqarsimasut. Immikkut sanalunnermik ineriartortitsisimapput, saanernik, tuugaanik, qissianik ukkusissanillu qiperuillutik. Qiperugaat tassaasarsimapput sakkumik assilineri mikisunngorlugit, inuit uumasullu soorlu nannut, puisit aarrillu.
Itsarnisarsiuuni sivisuumik isumaqartoqarsimavoq qiperorlugit eqqumiitsuliat pingaartumik upperisarsiornermik siunertaqarsimasut taamaattumillu angakkunit atorneqarnerusarlutik. Tamanna Mari Hardenbergip allannguallanniarpaa. Isumaqarporli eqqumiitsuliat tassaanerusut aarnuat, taamaasillunilu Dorset-kulturianni ulluinnarni atugaasimallutik:
– Dorset-kulturi sivisuumik kitaamiunit isiginiarneqarluni paasiniarneqarsimavoq. Kitaamiulli eqqarsartariaasiat Dorset-kulturimut atuutsissinnaanngilarput. Akerlianik misissuinimma ilimanarsisippaat Dorset-kulturip ullumikkut kitaamiut kulturiattut inuit uumasullu, kulturi pinngortitarlu, pissusilersornerit ulluinnaallu taama ersaritsigisumik avissaartissimanngikkaat, Mari Hardenberg oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER