Kalaaleq isiginnaartitsisartoq 11-nik ukiulik Oscarinnanniunnermi oqaluttuarisaanermut ilanngunniarpoq

Filmi naatsuliaq ”Ivalu” Oscarinnanniunnermut ilaassaaq, isiginnaartitsisartullu Kalaallit Nunaannut ukkatarinnitsitsilissallutik neriuutigaat.

11-nik ukiulimmut Mila Heilmann Kreutzmannimut uppernanngingajappoq, taanna maanna Hollywoodimiippoq, ataasinngornermi unnukkut Oscarinnatsitsisoqalerpat Dolby Theaterimiissaaq.

Kisianni tassa pisoq kalaallimut niviarsiaqqamut piviusumik pivoq, taanna siorna septembarimi Viborgimut nuuppoq, tassanilu ulluinnarni Houlkærskolenimi 5. klassimi atuartuuvoq.

Tassami filmimi naatsuliami ”Ivalu”-mi inuttaaqataavoq, taanna danskimit ilitsersuisumit Anders Walterimit ilitsersuisuuffigineqarpoq.

Filmi naatsuliani pitsaanerpaatut innersuunneqarpoq, taamaalillunilu inuusaliat tusaamasa ilaannik pissarsisinnaavoq.

Upperisinnaanngivikkaa

- Innersuunneqaratta upperisinnaanngilara. Maanga timmisartornitsinni allaat paasiuminaatsippara, Mila Heilmann Kreutzmann oqaluttuarpoq, qungujupporlu.

- Maanna tikippugut, misigisaq nuannerluinnarpoq. Amerikamiut Hollywoodimi filmiliaat amerlasuut takunikuuakka, taamaammat maaniilluni nuannerluinnarpoq, taanna oqarpoq.

Filmimi Pipaluk inuttaaffigaa, taassuma angajuni ujarpaa.

Filmimi naatsuliami sakkortuumi, oqaluttuaaraliamit assilialersukkamit ”Ivalu”-mit tunngaveqartumi, angajuusoq ataataminnit atornerlugaasimasoq paasinarsivoq, taassumalu periarfeerunneranut alianarluinnartumik immaqa nassuiaatissaqartoq.

Siullermik itigartitsisoq

Kalaaleq isiginnaartitsisartoq Angunnguaq Larsen, amerlasuut DR-imi nangeqattaartuliamit iluatsilluartumit ”Borgen”-imit ilisarisimaneqartumut, ataatatut inuttaanissamut akuersiniarneq oqitsuinnaanngilaq.

- Aallaqqaammut itigartitsigaluarpunga, tassami oqaluttuaq alianartupilussuullunilu uanga misigissutsinnut ungasilluni inissisimavoq, taanna oqaluttuarpoq-

- Kisianni sammisaq aamma qaammarsaavigineqartariaqartoq isumaqarpunga, tassami amerlasuut aqqusaartarmassuk. Tamatumalu isumaga allanngortippaa, filmilu naatsuliaq immaqa meeqqat ilaannut iluaqutaasinnaassaaq, taanna oqarpoq.

Filmimi tamanna anguniagaavoq, ingerlatsisoq Rebecca Pruzan oqaluttuarpoq.

Paqumigineqaqisoq

- Kalaallit Nunaanni kisimi pinnani, nunarsuaq tamakkerlugu. Ajoraluartumimmi sumi tamani pisarpoq, taanna oqarpoq.

- Qanigisanut pinngitsaaliineq paqumigineqartuuvoq. Taamaattumillu isiginnaartitsisartugut filmimut kiinartaanermikkut sapiilluinnartut isumaqarpunga, taanna oqarpoq.

Mila Heilmann Kreutzmannip oscarinnatsitsinermi nunagisaminut kusanartumut ukkatarinnitsitsisinnaaneq aamma pingaartittorujussuuaa.

- Oqaluttuarisaanermut ilanngulluta misigisimavunga. Kalaallit Nunaatalu pinngortitaa kusanarluinnartoq takutissinnaagatsigut tulluusimaarutigalugulu nuannaarutigaara, taanna oqarpoq.

Kalaallit Nunaanni aamma erfalasoq erfalatinneqarpoq, Angunnguaq Larsen oqaluttuarpoq, taassuma nuliassani meeqqatillu pingasut Nuummi najugaqatigai.

- Kalaallit Nunaat tamakkerlugu malinnaasut isumaqarpunga. Nunatsinni kulturip illorsuani aaqqissuisoqalerpoq, tassani skærmersuakkut malinnaassapput, taanna oqaluttuarpoq.

Oscarinnatsitsineq ataasinngornermi unnukkut pissaaq.

Powered by Labrador CMS