Kalaaleq inuusuttoq Shanghaimiittoq: Coronavirusertoqarnera annilaanganarpoq

Hannah Olsen Ilulissaneersoq maanna Shanghaimiippoq. Shanghai 24 milliuuninik innuttaasoqarpoq. Nappaat siornatigut ilisimaneqarsimanngitsoq coronavirus napparsimassutaalluni siaruaatilermat, illoqarfissuarmi immikkut sillimaniartoqarpoq.

Coronavirus Wuhanimi napparsimassutigineqaqqaarpoq, illoqarfissuullu matuneqannginnerani wuhanimiut 300.000-it missaat Shanghaimut qimaasimapput.

- Tuapannarpoq annilaanganarlunilu. Napparsimasoqartaqattaalersoq tusaqqaaratsigu qanoq iliussanerluta nalulerparput. Angajoqqaarsiatta oqarfigivaatigut angerlarsimaffitsinniit anissanngitsugut. Taamaattumik pisariaqavitsinnagu anineq ajorpugut, Hannah Olsen 20-nik ukiulik Sermitsiaq.AG-mut oqaluttuarpoq. Taanna aamma oqaluttuarpoq akunnittarfiit maanna qanillisarnagit, angalasut akunnittarfimmiittarmata.

Immikkut sillimaniarneq

Hannah Olsen Shanghaimi EF-ip oqaatsinik atuarfiani mandarinitut oqaatsit ilikkarusullugit atuarpoq. Ilinniartut nunanit allaneersut atuaqatigai.

Atuarfilli arfininngorneq januarip 25-iannili matugallarpoq, soorlu aamma filmertarfiit, aliikkusersuisarfiit allarpassuillu aamma matugallarsimasut.

Hannah Olsen oqaluttuarpoq kineserit ukiortaarsiornerat pingasunngormat nalliuttorsiutigineqarmalli, inuit coronavirusimik napparsimalersut amerlanerulersimasut.

- Inoqanngiusappoq. Illoqarfissuaq milliuunerpassuarnik inoqartoq inoqanngiusannera tupinnarpoq. Qimuttuitsuni ilaasoqarpianngilaq, sumiiffiillu arlallit matoqqallutik. Inuit aninissaminnut qunupput, oqarpoq.

Kiinarpak illersuut tunillannartuiaatillu

Kinap ilaani Wuhanimi decemberimi 2019-imi coronavirusimik napparsimalersoq siulleq paasineqarpoq. Taassuma kingornali inuit 2.700-t sinnillit tunillanneqareersimapput. Virusimik napparsimasut ikinnerpaamik 80-it maannamut toqusimapput. Kinami napparsimalersut saniatigut, Australiami, Frankrigimi, Japanimi, Malaysiami, Nepalimi, Canadami, Singaporemi, Sydkoreami, Taiwanimi, USA-mi, Thailandimi, Cambodjami aamma Vietnamimi napparsimasoqartoq paasineqareerpoq.

Coronavirus puannik aseruutsitsilersarpoq anersaartorniarnermillu ajornartorsiortitsilersarluni.

Virusip siaruaatilertornera uumasut nujuartat neqaannik niuerfimmit aallaaveqarsorineqarpoq, uumasulli suut tunillaasimanersut suli ilisimaneqarani. Paasissutissat kingulliit malillugit nappaat inummiit inummut tuniluuttarpoq.

Shanghaimi Kinamilu illoqarfissuarni allani innuttaasut angerlarsimaffimminniit anissagunik illersuummik kiinarpaqarnissaat peqqussutigineqarpoq. Assaat saligaatsinnissaat piumasarineqarpoq, inuit allat qanillivallaarneqassanngillat napparsimasutullu misigisinnaasut tamarmik nakorsiaqquneqarlutik. Hannah Olsenip inuk sisorarluni illersuutinik isaruaqartoq allaat takusimavaa, paasisaami malillugit napparsimalissutaasartoq isit aqqutigalugit aamma tuniluuttarpoq, oqaluttuarpoq.

- Tamanna annilaanganarpoq uannullu nutaarluinnaalluni. Uagutsinni illersuutinik maskeuteqarpugut assannullu tunillannartuiaatinik saliguteqarluta. Illoqarfissuarmili pisiniarfinni tamani kiinarpaat illersuutit tunillannartuiaatillu nungoreersimapput, Hannah Olsen oqaluttuarpoq.

Spaniamut Malagamut nuussaaq

EF-imi atuartut tamarmik pingasunik periarfissinneqarsimapput. Shanghaimiiginnarsinnaapput, nunamut allamut nuullutik atuarnertik nangissinnaavaat imaluunniit atuarneq maajimi naasussaagaluartoq unitsiinnarlugu angerlarsinnaapput.

- Angerlarnissara siunniukkaluarpara. Aningaasalli atorsimasakka utertissinnaannginnakkit aalajangiinnarpunga Malagamut nuussallunga, Hannah Olsen ilisimatitsivoq.

Hannah Olsenip Shanghaimiinnini nuannarigaluarpaa. Innuttaasut tikilluaqqusilluarnerat malugisimavaa, illoqarfissuarmilu nuannersunik misigisaqartarsimavoq.

- Shanghailiaqqikkusuppunga kingusinnerusukkut, maannali maaniinnissara Asiamiluunniit allamiinnissara qunugingallarpara. Nappaatip siaruaattup atuunnerani maaniikkusunngilanga, oqarpoq.