Kalaaleq ilinniartoq ajugaasoq
Ilisimatusarfimmiit Tukumminnguaq Nykjær Olsen ilinniartut aqqaneq marluk ilisimatusarfiit tallimaneersut unammisinneqarneranni ajungaavoq. Tukumminnguup isumassarsiani qulequtalik ’Innovation is about inclusion – let’s make Arctic inclusive’ ajungaassutigivaa. Unammisitsineq Harvard Kennedy School of Government'imit aaqqiissuunneqarpoq.
Ilinniartut issittumi unamminartut qanoq aaqqiissuteqarfigineqarsinnaanerannut isumassarsiaminnik saqqummiipput. Peqataasut tamarmik isumassarsiatsialannik saqqummiipput, soorlu ilaatigut saqqummiunneqarput najukkami pigineqartunik turisteqarnermut suliffeqarfiit, drone-nik atuineq kiisalu suliffik internettikkuinnaq aqutaq.
Saqqummiineq
Unammineq aqqaneq marlunnik peqataaffigineqartoq isumassarsianik minutsit marlunnik minutsillu affaata iluani sivisussusilimmik tuluit oqaasii atorlugit saqqummiiffigineqarpoq. Tusarnaartut 250-it missaanniittut isumassarsiatsilaasorisaminnik toqqaammata Tukumminnguup isumassarsiaa toqqarneqarnerpaavoq.
Atuarfinni peqataatitsinerunissamut Tukumminnguaq saqqummiussaqarpoq, tassani oqarluni atuarfeqarfinni nunaqavissut ilisimasaat akuutinneqarnerunissaanut, Europamiut ilisimasaat atorlugit atuartinneqarnerup saniatigut. Massakkut atuarfeqarfiit Europamiut atuartitseriusaannut maleruuppallaarput, Tukumminnguup siunnersuutigaa ilisimasat tamarmik atuartitsinermi
akuutinneqartariaqartut.
- Nuannaqaanga ajugaagama, nuannaarutigalugulu tusarnaartut isummannik isumaqataasinnaammata, neriullungalu isummersuutikka tiguneqarumaartut tamattami inissaqartariaqarpugut nunarsuatsinni, taamak islandimit Tukumminnguaq nuannaagaarluni oqarpoq.
Ataatsimeersuarnermut ilaasoq
Unammisitsineq Reykjavikkimi Arctic Circle-rtoqarnerani ingerlanneqarpoq. Unammineq akunnerni marlunni sivisussuseqarpoq, Tukumminnguarlu ajugaanerata kingorna tusarnaartut amerlasuut aggiupput isumassarsiaanut paasisaqarnerorusullutik, Tukumminnguarlu aamma Islandimi tusagassiutinit apersorneqarpoq.
