Kalaaleq crossfittertartoq VM-imilerpoq
40-nik ukiulik Maria Grødem crossfitterluni USA-mi VM-imi unammeqataalerpoq. Nunarput sinnerlugu aatsaavissuaq timersuummi tassani unammiartoqalerpoq. Crossfittertartorlu aningaasaliisussanik suli amigaateqarpoq.
Maria Grødemip Nunatsinni aamma crossfittertartoqartoq USA-mi julimi takutittussanngorpaa. Unammiarnissaminullu suli aningaasaliissussanik amigaateqarpoq.
- Naatsorsuutigaara 85.000 koruunit unammiarnissamut atussallugit. Nunarsuarmi pissartanngorniutivinneq sioqqullugu Danmarkimi sungiusariartariaqarpunga. USA-mullu sapaatip akunnera sioqqullugu tikittariaqarlunga, timima nalunaaquttap nikinnera sungiunniassammagu, Maria Grødem Sermitsiaq.AG-mut oqarpoq.
VM-imut anngunniunnermi Maria Grødem video aqqutigalugu peqataavoq. Taanna sungiusaasunilu VM-imut aaqqissuisunut, The Crossfit Openimut videonik nassiussipput. Naatsorsuutigisaminiit angusaqarnerujussuuvoq, tassami nunarsuarmi crossfittertartuni nummer 13-iulluni naammassivoq. VM-imullu anngunniaraanni pitsaanerpaat 20-t akornanniittariaqarpoq.
- Ukioq ataaseq affarlu matuma siorna nutaamik sungiusaasortaarpunga, taanna ateqarpoq Phil Mansfield. Crossfittimut pikkorissorujussuuvoq timersuutillu allat aamma pikkoriffigalugit. Sungiusarnissara aaqqissortarpaa ullormullu akunnerni pingasuni tallimaniluunniit sungiusartuarlunga, crossfittertartoq kalaaleq oqaluttuarpoq.
VM-imi ima unamminiarpoq
Crossfittimi unammigaanni naluneqartuaannarpoq suna unammissutigineqarniarnersoq. Unammersuarneq ulluni sisamani ingerlanneqassaaq, taamaattumik unammersualivinnermi sungiusaasunilu aatsaat pilersaarusiortassapput.
- Suulluunniit piareersimaffigineqartariaqarput. Ullormut unammissutigineqartussat assigiinngitsut quliniit aqqaneq-marluk tungaanoorsinnaapput. Taamaappat 2 kilometerit qanoq sukkatigisumik arpassinnaanersunga imaluunniit 400 meterisut takitigisumut qanoq sukkatigisumik nalussinnaanersunga qanorluunniit oqimaatsigisoq kivissinnaaneriga aaqqissuuteqqissaartasssavarput, Maria Grødem oqaluttuarpoq.
Corona nalorninartorsiortitsivoq
Danmarkimiit ullumikkut USA-liartoqaqqusaanngilaq, naak Nunatsinniit USA-liartoqarsinnaagaluartoq. Unammersuarnerlu sioqqullugu Danmarkimi sungiusaqqaartariaqarami, USA-liannginnermini danskit coronamut maleruaqqusaat allanngortinneqarumaartut, Maria Grødemip neriuutigaa.
- Pilerisorujussuuvunga, kisianni aamma pissangavunga. Nalorninartorsiortitsisut maanna amerlapput, tamannalu erloqinarpoq, crossfittertartoq VM-erialersoq oqarpoq.