Kalaaleq Aalborgimi sikkilerluni biilinik aportilluni toqukkut qimagussimavoq
Inuppassuit ajunaarfimmut naasunik naneruutinillu ilioraasimapput.
Margrethe Sakariassen (Makka) 58-inik ukiulik tallimanngormat unnukkut aqqusinermi ajutoortoqarnerani toqutaasimavoq, Aalborgimi Kofoed Skole Facebookikkut ilisimatitsivoq.
Ajutoorneq pisimavoq Margrethe Sakariassenip Aalborgip kanginiani najugaqarfiata eqqaani.
Unnukkut qulingiliuat eqqaanni aqqusineq ingerlaarfiusartupilussuaaq Humlebakken sikkilerluni ikaarniarsmavaa – arnamillu 51-inik ukiulimmit aportilluni, aporsisoq ajoqusersimanngilaq. Ambulancemik aqutsisut nakorsallu ikiueqqaarlutik annaanniarsimagaluarpaat, ajoraluartumilli iluatsitsisimanngillat, piffissallu sivikitsup ingerlanerani sikkilertoq toqukkut qimagussimalluni, Nordjyllandimi Politiit ilisimatitsipput.
- Pisimasoq suli misissorneqarpoq, pisimasorlu erseqqissumik paasisaqarfigitinnagu alianaqisumik ajunaartoqarnerani pissutsinik politiit oqaaseqarsinnaanngillat. Takunnissimasinnaasut Nordjyllandimi Politiinut 114 aqqutigalugu saaffiginneqquneqarput.
- Ilaqutaasut nalunaarfigineqareersimasut, Nordjyllands Politiini attaveqatigiinnermi sulisoq Christian Brinck Sermitsiaq.AG-mut oqarpoq.
Makka maqaasineqassasoq
Sapaatip akunnerata naanerani inuppassuit Margrethe Sakariassen eqqaaniarlugu Aalborgimi ajutoorfimmukaasimapput, naasunik ilisisarlutik naneruummillu ikitsisarlutik. Sapaatiummat unnukkut aqquserngup sinaani naneruutit ikinneqarsimasut 50-t missaannik amerlassuseqarput.
Aalborgimi Kofoeds skole eqqaaniaalluni Facebookikkut allappoq:
”Makka arnaavoq nuannersoq, qunutitassaanngitsoq akuersaartuusorlu. Makka sulinissaminut qununngisaannarpoq, Kofoeds Skolemilu ikiorneqarnissamik pisariaqartitsigaangatta ikiortarpaatigut.
Makkap panini erninilu tulluussimaarutigilluinnartarpai akulikitsumillu oqaluttuarisarlugit. Oqaloqatiginerani malunnartarpoq, ilaqutariinni asanninneqarluarlunilu ataqatigiilluartoqartoq. Marluullusi annaasaqarnissinni misiginneqatigingaarpatsigit.
Makka inuuvoq qungujulasoq! Makka qiimmassaasuuvoq! Makka tapersersuisuullunilu isumassuisuuvoq! Makka inutsialassuuvoq initusoq!
Makka Kofoeds Skolemi maqasiineqassaqaaq. Makkap eqqaaneqarnera ataqqinartuuli” Aalborgimi Kofods Skole allappoq.
Kofoeds Skolemit peqatigitillugu nalunaarutigineqarpoq, ataasinngorpat Aagademi Margrethe Sakariassenimik eqqaaniaarusuttunut kaffeqarlunilu kaageqassasoq.