Kalaaleq 38-nik ukiulik toqutsisimannginnerartoq
Angut 38-nik ukiulik Amager-imi poleniumiumik 43-nik ukiulimmik toqutsisimasutut sapaatit akunnerini sisamani tigummigallagassanngortinneqarpoq. KNR naapertorlugu angut Kalaallit Nunaanneersuuvoq.
38-nik ukiulik toqutsisimasutut pisuunnginnerarpoq, nakuusersimaninili nassuerutigalugu. Tamanna Københavnip Eqqartuussisoqarfiani eqqartuussisup Peter Lind Larsenip matoqqasumik inatsit tunngaviusoq naapertorlugu killisiuisoqarnerani paasinarsivoq.
Angutip timaa Christmas Møllers Plads-ip eqqaani Amager-imi Københavnimi pingasunngormat politiinit siumorneqarpoq.
Persuttaaneq
Politiit unnerluussutaat naapertorlugu angutip persuttarneqarnini toqqutigisimavaa. 38-nik ukiulik allanik peqateqarsimanera, unnerluussummi aamma allassimavoq. Inuilli taakku kinaassuserneqarsimanngillat.
Københavnimi politikommissæri Carsten Ahrends KNR-imut paasissutissiaraa, toqutsineq atornerluisarfimmi pisimasoq.
Pingasunngornermi unnukkut tigusarineqartoq
38-nik ukiulik pingasunngornerup unnukkuani tigusarineqarpoq. Piffissami tassani politiit inunnik pingasunik tigusarinnissimapput, 38-nillu ukiullip tigusarineqarnerata kingorna taakku iperangaapput. Taakku toqutsinermi peqataasimanngitsutut, politiinit nalilerneqarpoq.
Eqqartuussisup Peter Lind Larsenip angut unnerluutigineqartup pasineqarnissaanut tunngavissaqartoq.
Angutillu iperangaassangaluaruni politiit paasiniaanerannut sunniuteqarsinnaasoq, eqqartuussisumit aamma nalilerneqarpoq. Taamaammat sapaatit akunnerini sisamani tigummigallangaanissaanik eqqartuussisoq aalajangerpoq.