Kalaaleq 22-nik ukiulik biilinik aporneqarnermigut ajunaartoq

Sakkutooq 22-nik ukiulik ataasinngormat unnukkut Timmisartoqarfiup Karupip eqqaani biilinik aporneqarami ajunaarpoq.

Midt- og Vestjyllands Politiini marlunngormat unnuakkut pigaartuusoq Simon Skelkjær taamatut ilisimatitsivoq. KNR-imit ilisimatitsissutigineqarpoq angut Kalaallit Nunaanni najugaqartoq Aasiannilu inunngorsimasoq.

Biilimik aquttoq qimaasimavoq, politiillu tassunga atatillugu biilimik assartuummik qaqortumik qalipaatilimmik aquttoq attaveqarfigerusuppaat.

Biili taanna unnukkut qulingiluanut tanneq arfineq-pingasut missaanni rute 12 aqqutigalugu avannamukarsimavoq. Aquttup biilimik qimaasoq takusimasinnaavaa, politiit marlunngormat ualikkut ilisimatitsipput.

Angut inuussuttoq rute 12-imi Herningvejimiittumi timmisartoqarfiup silataaniissimavoq.

Uummarsaaqqikkaluarneq iluaqutaanngitsoq

Illersornissaqarfiup timmisartoqarfimmi sulisui siulliullutik ajunaarfimmut apuussimapput. Angulli taanna inuusuttoq uummarsaqqinneqaraluarami annaanneqarsinnaasimanngilaq, Simon Skelkjær oqarpoq.

Politiit unnukkut qulingiluanut tanneq qulingiluat nalunaarfigineqarput, kingunitsiannguatigullu politiit ambulancelu ajunaarfimmut apuullutik.

Biilinik apuisoq apuiffimminiit qimaasimavoq. Biili Viborgip tungaanukarluni avannamukarpoq.

Tassunga atatillugu biili Peugeot 206-itut angitigisoq politiinit ujaarineqarpoqq, biili saamigut ajoqusersimavoq. Qasertumik qasertumilluunniit qillaarissumik qalipaateqannguatsiarpoq.

- Biilimut assingusumik takunnissimasinnaasut tusarusuppavut. Immaassinnaavoq mianersuaalliorluni allatulluunniit assigisaanik biilertoqarsimasoq, pigaartut ittut oqarpoq.

Takunnissimasinnaasut politiinut 1-1-4 aqqutigalugu saaffiginneqquai.

Kalaallip sakkutuup 22-nik ukiullip ilaqutai ilisimatinneqareerput.