KAK: Siulittaasussatut allamik sassartoqarpoq

Arsaattarttut kattuffiat KAK arfininngorpat ataatsimeersuassaaq, tassani siulittaasumik qinersisoqarnissaanut siulittaasussatut sassartut marluupput. Siusinnerusukkut siulittaasuusimasoq John Thorsen Benjamin Kielsenimut sapaatip akunnerani matumani siulittaasussatut sassartumut unammillissaaq.

Arsaattartut kattuffiani KAK-mi 2014-mit 2019-mut siulittaasuusimasoq John Thorsen,
siulittaasussatut sassarpoq.

Kattuffik arfininngorpat ataatsimeersuassaaq, tassani siulittaasumik qinersisoqartussaavoq.
Siulittaasumut qinersinissamut Benjamin Kielsen aamma qinigassanngortippoq.

Aningaasaliissutaasartut nalimmassarneqassasut

- NBU-mit innersuunneqareernerma kingorna siulittaasussatut sassarpunga, John Thrsen Sermitisaq.AG-mut oqarpoq.

Taassuma kattuffimmut aningaasaliissutit nalimmassarneqarluartalernissaat ilaatigut
qineqqusaarutigaa. Kattuffimmi marlunnik timersuuteqarpoq, tassa futsal kiisalu silami
arsaanneq.

- Aningaasalersueriaatsip allanngortinneqarnissaa sulissutigineqartariaqarpoq. Futsalimut
aamma silami arsaannermut immikkut aningaasaliisoqartalertariaqarpoq. Maannakkut
atuuttumit ingerlariaqqittoqartariaqarpoq, tassami KAK nammineerluni futsalimut silamilu
arsaannermut aningaasat agguaattarmagit. Taamatut ingerlaannartoqarsinnaanngilaq,
aningaasaqarnikkummi siunissaq isigalugu imminut ataqatigiikkunnaassammat, taanna oqarpoq.

KAK ilaasortanngornissamut qinnuteqaateqarsimasoq

John Thorsenip ilisimatitsissutigaa, KAK Amerikap avannaata kattuffianut Concacaf-imut ilaasortaalernissamik qinnuteqarsimasoq. Kalaallit Nunaat tassunga
ilaasortanngussagaluaruni siunissami ilaatigut USA, Canada aamma Mexico
unammisalersinnaavai.

- Qinnuteqaatip akuerineqarnissaanut utaqqinermi ineriartortitseqqinnissamut
inissaqarluartoqarpoq. Arsaatillaqqissorpassuaqarpugut, uagut aqqutissiuussisussaavugut
ajunnginnerpaaq anguniarlugu. Taamaattumik nunat qanigisatta
suleqatigilluarneqarnerulernissaat neriuutigaara, John Thorsen oqarpoq.

Powered by Labrador CMS