pilluaritsi
Kakkaak: Marlulissat 41-nik A-nik karakterinnapput
Meeqqat atuarfianni initigut atugassarititaasut pitsaanngikkaluarlutut Ilulissani atuartut soraarummeernermi angusarissaarput
Ukioq atuarfiusoq atuarfigisamit oqummit eqqugaasumit anisariaqarnermik nassatalik aqqusaareerlugu Ilulissani Atuarfik Mathias Storchimi atuartut angajulliit soraarummeerluarput. Marlulissat Camilla aamma Linda Bagger karakterigissaarnermikkut immikkut maluginiarneqarput.
Atuaruk: Misilitsinnermi arlaleriarluni angusarissaartoq
Atuaruk: Qaanaami atuartoq A-mik karakterinnappoq - erfalasulerutaallunilu
Atuarfik Mathias Storch siorna matuneqarpoq annertuumik oqoqarmat. Taamaattumik atuartut illoqarfimmi sumiiffinnut arfineq pingasunut agguataarlugit atuartinneqarsimapput. Taamaakkaluartoq soraarummeerluarput atuarnermillu naammassisut soraarummeersimanermut uppernarsaataat marlunngormat timersortarfimmi agguaanneqarput, tassanilu paasinarsivoq atuartut arlallit angusarissaarsimasut.
Angajoqqaat tapersersuinerat
- Maluginiartakkatta ilagaat atuartut angajoqqaanit tapersersorneqarlutillu qanimut malinnaavigineqartut angusarissaartartut, Atuarfik Mathias Storchimi pisortap tullia siulleq Lena Ravn Davidsen Sermitsiaq.AG-mut oqaluttuarpoq.
Marlulissat Camilla aamma Linda Bagger immikkuullarissumik angusarissaarput. Camilla Bagger 21-nik A-nnappoq Linda Baggerilu 20-nik A-nnalluni.
- Taakku annertuumik angajooqqaaminnit qanimut malinnaavigineqarlutillu tapersersorneqarsimapput, meeqqat atuarfianni atuartuunerminni. Ilaatigut angajoqqaat sinniisaannut peqataanermikkut, aammali piumasaqaatinik siunnersuutinillu pitsaasunik atuarfimmut ingerlatisarsimallutik. Minnerunngitsumik meeqqaminnut piumasaqateqartarsimapput, pitsaasumik angusaqarnissaannut, Lena Ravn Davidsen oqarpoq.
Atuarfik Mathia Storchip isaternera aallartinneqareerpoq atuarfimmillu nutaavimmik taarserneqassalluni.