KAK nutaamik siulittaasortaassaaq
Arsaattartut kattuffianni KAK-mi siulittaasoq Finn Meinel siulittaasutut ingerlaqqissanani aalajangernikuuvoq. Siulittaasuussatulli suli sassartoqanngilaq.
KAK Nuummi novembarip arferngani ileqquusumik ataatsimeersuassaaq, tassani kattuffummi siulittaasumik qinersisoqassaaq.
Finn Meinel siulittaasutut ingerlaqqissanani KNR-imut ilisimatitsereerpoq.
Siulittaasumut suli qinersinissamut siulittaasussatut qinigassanngortittoqarsimanngitsoq KAK Sermitsiaq.AG-mut ilisimatitsivoq.
- Suli qiningassanngortittoqanngilaq, ullormi ataatsimeersuarfissami sassartoqarsinnaavoq, KAK-mi siunnersorti Nîsínguak’ Lundblad Geisler ilisimatitsivoq.
Nunap immikkoortuanik aallartitat
Timersoqatigiiffiit nunap immikkoortuanit aallartitanik toqqaasinnaapput, KAK-p ileqquusumik ataatsimeersuarnerani peqataasinnaallutik.
- Lokalunion-inik aamma sassartitsisoqartussaavoq sinerissamiit. Maannakkumut tunumiit ataaseq, avannaaniit ataaseq sassartussatut nalunaarnikuupput. Taamaattumik sinerissamiittut kaammattorusuppagut sassartitassaminnik innersuussissasut, taamaalillutik nunatsinni arsaannerup ineriartorluarnissaanut sunniuteqataalluarsinnaangamik, Nîsínguak’ Lundblad Geisler oqarpoq.
Nunap immikkoortuanit aallartitanut inissat 14-iupput, imalu immikkoortiterneqarsimallutik:
- Avannaa: 2
- Qeqertarsuup Tunua: 3
- Qeqqa: 3
- Nuuk: 3
- Kujataa: 2
- Nunap Kangia: 2