KAK nunanut allanut unammisartunut sungiusaasumik atorfinititsivoq
Angutit nunanut allanut unammisartui sungiusaasortaarput. Morten Rutkjær KAK-mit sungiusaasussatut atorfinitsinneqarpoq
Danmarkimi arsaannermi divisionini sungiusaanermik misilittagalik Morten Rutkjær angutit nunanut allanut unammisartuinut sungiusaasutut KAK-mit atorfinitsinneqarpoq.
Arsaattartut kattuffiata tamanna tusagassiutinut nalunaarummi nalunaarutigaa.
Illoqarfiit marluk tikissavai
- KAK-mit nunanut allanut unammisartunut sungiusaasussatut neqeroorfigisinnaammannga tulluusimaarpunga. Arsaannerup ineriartortinneqaqqinnissaanut suleqataassaanga, ineriartornissamut periarfissaqarluartoqarpoq, aamma anguniakkanik ulikkaarpunga, nunanut allanut unammisartunut sungiusaasunngortoq oqarpoq.
Taanna Ilulissat aamma Nuuk qaammammi matumani tikeraassavai.
- Nuummiissaaq aggustip 15-anit 20-at ilanngullugu, Ilulissaniissalluni aggustip 21-anit 27-at ilanngullugu, tassani arsaattartut pisinnaasai takussavai. Illoqarfiit allat tikisiinnaanngikkallarpai, taamaattoq timersoqatigiiffinni allani sungiusaasut suleqatigilluassavai, arsaattartut taamaasilluni malinnaaffigissallugit, KAK allappoq.
Island Gamesertoqarnissaanut qilanaarpoq
Island Games aappaagu pisussamut piareersaasiussalluni oqarpoq.
- Guernseyimi Island Gamesertoqarnissaanut arsaattartunik peqataasussanik toqqaassaanga. Tamanna qaammatini tulliuttuni suliaq ingerlassaaq. Nunat tamalaat eqqarsaatigalugit kalaallit unammillersinnaanerulernissaannik aqqutissiueqataassaanga, ilaatigut oqarpoq.