KAK-mi siulittaasunngorniarluni nalunaaruteqartoq siulleq

Arsaattartut kattuffiat KAK qaammatip tulliani ileqquusumik ataatsimeersuaruni nutaamik siulittaasortaassaaq, siulittaasoq Finn Meinel tunuarniarluni aalajangersimammat.

Narsameersoq 44-nik ukiulik Benjamin Kielsen arsaattartut kattuffianni KAK-mi siulittaasunngorniarluni pisortatigoortumik nalunaaruteqartut siullersaraat.

Kattuffik novembarip arfernani Nuummi ileqquusumik ataatsimeersuassaaq, Finn Meinelilu siulittaasutut ingerlaqqinniarani aalajangersimammat siulittaasussamik nutaamik toqqaasoqassalluni.

Futsalimi Nunarsuarmi Pissartanngorniunneq

Benjamin Kielsen KAK-p siulersuisuini ilaasortaavoq, maannalu siulittaasunngornissani siunniussimallugu.

- Ilaatigut futsalimi nunanut allanut unammisartutta nunarsuarmi pissartanngorniuttoqarnerani peqataasarnissaasa aqqutissiuunneqarnissaannut piareersimavunga. Unammisartuvut ukiuni kingullerni ineriartorsimaqaat, taamaammat pissusissamisuuginnarpoq unammisartutta nunarsuarmi pissartanngorniuttoqarneranut peqataasarlernissaat anguniarlugu KAK-mi sulissuteqarnissarput, Benjamin Kielsen Sermitisaq.AG-mut oqarpoq.

Pissartanngorniuttoqartarnera

Klubbini piginnaanilinnik sulissuteqartarneq aamma qaffassarneqassasoq taanna erseqqissaavoq.

- Taamaammat sungiusaasut piginnaaneqarnerisa qaffassartuarneqarnissaat aamma pingaaruteqarpoq. Taakkuuppummi timersuummik ingerlatsitsuusut. Aamma illoqarfinni assigiinngitsuni arsaalluni pissartanngorniuttoqartarnissaa pingaaruteqarpoq, taamaallaammi Ilulissani, Sisimiuni Nuummilu arsamik pissartanngorniuttoqartarpoq. Illoqarfiit allat aamma periarfissinneqassaput, pingaartumik tunumiittut. Illoqarfinnit assigiinngitsunit peqataatitaqartumik Tunumi unammersuartitsisoqarsinnaavoq, meeqqat nuannaartorisaminnik isiginnaagaqartarnissamut periarfissillugit, Benjamin Kielsen oqarpoq.

KAK-mit Sermitsiaq.AG-mut ilisimatitsissutigineqarpoq, Benjamin Kielsen maannamut kisiartaagallarluni siulittaasunngorniarluni nalunaaruteqarsimasoq. Ileqquusumilli ataatsimeersuarnermi allat sassarnissamut suli periarfissaqarput.

Lokalunionimi ilaasortassanik suli amigaateqartoqartoq kattuffik Sermitsiaq.AG-mut ilisimatitsivoq. Tassani ilaasortat kattuffiup ileqquusumik ataatsimeersuarnerani, Nuummi arfininngorpat tulliani ingerlanneqartussami, peqataassapput.


Lokalunion amingaatigineqartut:
Avannaaniit ataaseq
Qeqertarsuup tunuaniit ataaseq
Qeqqaniit marluk
Kujataa ataaseq
Tunu ataaseq

Powered by Labrador CMS