KAK-mi siulittaasoq: Isikkamik arsaannermut aningaasaliisoqarnerusariaqarpoq

Kalaallit Arsaattartut Kattuffiata aningaasaqarnermigut tatineqarnera pissutaalluni kattuffiup siulittaasuata Finn Meinelip politikerit oqaloqatiginiarpai

Isikkamik Arsaattartut Kattuffanni, KAK-mi, siulittaasunngorlaap Finn Meinelip kattuffimmi siulittaasuunermini anguniagai pillugit Sermitsiaq.AG-mit apersorneqarpoq.

- Isikkamik arsaannerup tungaatigut ineriartorfissaqarluarpoq, arnani angutini aamma meeqqanit inersimasunut. Taamaattoq aningaasaqarnerput inissisimanerluppoq, Finn Meinel oqarpoq.

Akisussaassusilimmik aningaasaqarnissaq

Kattuffiup ukiuni kingullerni ingerlanneqarneratut ingerlanneqaaannassappat isikkamik arsaannerup ineriartortinneqarnera unikaallassinnaasoq oqarpoq.

- Ukiumut ulluni 161-ni unammisaqattaartitsisarpugut, aasakkut ukiakkullu unammisoqartarluni. Taakku ingerlanneqarneri, dommerit, angalanerit, ajugaasunut ujammit, aningaasarsiat ullormusiassallu kattuffimmit aningaasalersorneqartarput. Ukioq kaajallallugu suliaqartarpugut, timersornerup tungaatigut kattuffiit allat kikkut taamaasiortarpat? Tamanna pissutigisaanik silami nunanut allanut unammisartut unitsinneqarallarput - inersimasunut inuusuttunullu. Taamatut unititsigallarnissaq siulersuisunit anguniarneqanngisaannarpoq, kisianni aningaasaqarnerup tungaatigut akisussaassuseqassagutta taamatut aalajangertariaqalernikuulluta. Island Gamesimut peqataanissamut nalunaareerpugut, taamaattoq aalajangersinnaavugut peqataaniarnata, Finn Meinel oqaluttuarpoq.

Kattuffinnut aningaasalersueriaaseq

Kalaallit Nunaanni Timersortartut Kattuffiata kattuffinnut aningaasalersueriaasia pissutaalluni KAK-p aningaasaqarnera tassunga killissimasoq Finn Meinel oqarpoq. Ukiorpassuarni kattuffik aalajangersimasunik GIF-imit aningaasanik pissarsisarpoq, tamannalu ullutsinnut naleqqukkunnaarsimasoq oqarluni.

- Silami unammersuaarnernut aamma nunanut allanut unammisartut aalluttarnikuuagut siornatigut. Maanna futsal aamma ingerlatarilernikuuarput, tassunga aamma aningaasaliissuterpassuit atortarpagut. Naak taakku ataatsikkut ingerlatilernikuugaluarlugit, GIF-imit aningaasanik amerlanerusunik pissarsisalernikuunngilagut, taannalu pissutaalluni aningaasaqarnerput tassunga inissisimavoq. GIF tamanna pillugu saaffigisareerparput, aningaasanik amerlanerusunik tunisinnaanngilaatigut, taamaattumik politikerinut saaffiginnittariaqalerpugut, Finn Meinel oqarpoq.

Anguniakkami ingerlarsortut

- Qanoq ilisoqarpat KAK-mut pitsaanerpaassava?

- Aningaasat pisartakkagut marloriaatinngortinneqartuuppata uagutsinnut pitsaanerpaassagaluarpoq - maannakkummi aningaasalersueriaatsimi aggueriaatsimi silami arsaattarnermut kisimi tulluussagaavoq, Finn Meinel apeqqummut akivoq.

- Aningaasanik amerlanerusunik pinissamut politikerinut qanoq oqariartuuteqassavit?

- Kalaallit Nunaat nunarsuarmi timimik aalatitsinerpaalernissamik GIF siunertaqarpoq. Tassunga uagut suleqataalluarpugut, naatsorsuutigineqartuninngaannit suliaqarnerusarpugut, aningaasaliisoqartarneranit suliniuteqarnerusarluta. Nunarsuarmi timimik aalatitsinerpaamik anguniagaqartoqassappat uagut avaqqunneqarsinnaanngilagut, ilaasortaqarpugut ukioq kaajallallugu timersortuartunik, taamaattumik piumasagut tusaaneqartariaqarput. Taamaammat pingaartipparput suliagut politikerinut takutinneqarnissaat, ulluinnarni aamma unammillernartitagut takutinnissaat pingaartissavarput, Finn Meinel oqarpoq.

Powered by Labrador CMS