KAK isumaqatigiissummik sivitsuivoq

Kalaallit Arsaattartut Kattuffiata, KAK, nunanut allanut arsaattartunut sungiusaasunut sungiusaasumik, Morten Rutkjærimut, isumaqatigiissuteqarnertik julimut 2023-imut sivitsorpaat.

Morten Rutkjær kalaallit nunanut allanut arsaattartunut sungiusaasutut ingerlaqqippoq.

Kalaallit Arsaattartut Kattuffiat, KAK, tusagassiorfinnut taama ilisimatitsivoq.

- Tulluusimaarutigilluinnarparput Morten Rutkjærimut isumaqatigiissuteqarnitta sivitsornissaanut isumaqatigiissutigisinnaagatsigu. Morten ulloq siullermiit nunanut allanut arsaattartut inerisarnissaanut sunniuteqangaatsiarsimavoq, isumassarsiaalu kattuffimmit, arsaattartunit klubbiniillu tigulluarneqartarlutik. Arsaannerup iluani ineriartorluartoqarpoq, KAK-mi arsaattartut pillugit siunnersorti Nîsínguak´ Lundblad Geisler tusagassiorfinnut nalunaarummi oqarpoq.

Ataqatigiinneq pingaaruteqartoq

KAK naapertorlugu Morten Rutkjærip ilisarnaataasa ilagaat arsaattartut arsaattarfimmi avataanilu ataqatigiilluarnissaanik pingaartitsisuunera.

Morten Rutkjær EUFA Pro-mi sungiusaasutut ilinniagaqarpoq Danmarkimilu arsaattartunut assigiinngitsunut sungiusaasarsimalluni. Taassuma saniatigut DBU-mi sungiusaasunik ilinniartitsisutut atorfeqarpoq. Nunatsinniit nunanut allanut arsaattartunut 2020-mi augustimi sungiusaasunngorpoq.

- Nunatsinni arsaattartut nunanut allanut unammiartartut nukittorsarneranni oqaluttuarerusupparput "arsaanneq tassaaginnanngitsoq arsamik aqittaarerusaarneq, ataqatigiinnerlu arsaaffimmi kisimi pisanngitsoq". Innuttaasut qanorluunniit tunuliaquteqaraluarpata ataatsimuulersittarpai, aalanerulersitsisarlunilu, Nîsínguak’ Lundblad Geisler oqarpoq.

Nîsínguak’ Lundblad Geisler ilisimatitsivoq nunanut allanut unammiartartut meeqqanit inuusuttuniillu nuannaartorineqartut. Ilanngullugu KAK-ip anguniagarinerarpaa nunanut allanut unammiartartut innuttaasunit tamanit nuannarineqalernissaat.

Powered by Labrador CMS