Skip to main content

KAK GM-ertitsinissamut immikkut akuersissummik qinnuteqartoq

Kalaallit Arsaattartut Kattuffiat, KAK, kingusinnerpaamik septembarip qaammataani silami arsamik Nunatsinni Pissartanngorniuttoqarsinnaanera neriuutigalugu, immikkut akuersissummik Namminersorlutik Oqartussanut qinnuteqarsimavoq.

Naalakkersuisut nunami coronap tuniluulluni siaruaassinnaanera ernummatigalugu, juulip qaammataa qiteqquttoq aalajangersimapput, inuit amerlanerpaamik 20-t katersuussinnaatitaassasut. Tamatuma malitsigisaanik KAK-mi siulersuisut silami ukioq manna nunatsinni pissartanngorniunnissamut anngunniunnissat Nunatsinnilu Pissartanngorniuttoqarnissaa taamaatiinnartariaqarsimavaat. KAK-li maanna iliuuseqarniarluni saqqummeqqippoq.

- Kommuninit assigiinngitsunit peqataatitaqarluni pissartanngorniuttoqarnissaanut qanoq periarfissaqarnersoq paaserusullugu coronamut atatillugu allattoqarfik saaffigisimavarput. Ajornartorsiutigaarput, illoqarfimmi tunillatsittoqarsimasoq paasineqaraangat aaqqissuussinissamik matusisoqartarneraa, KAK-mi siulittaasoq Finn Meinel Sermitsiaq.AG-mut  qarpoq. 

Katersuunnissamut ininullu kikkut tamarmik iserfigisinnaasaannut tunngatillugit nalunaarut maanna atuuttoq naapertorlugu, illoqarfimmi nunaqarfimmiluunniit ullut 30-t kingulliit ingerlaneranni tunillatsittoqarsimatillugu timersornikkut sammisassanik aaqqissuussisoqarsinnaanngilaq imaluunniit allatut aaqqissuussisoqarsinnaanngilaq.

Kingullertigut Nuummi, Aasianni, Upernavimmi, Tasiusami, Sisimiuni Kommuni Kujallermilu sumiiffinni arlalinni tunillatsittoqarsimavoq. Katersuunnissamut nalunaarut aggustip 31-ata tungaanut atuuppoq.

Killilersuutit sivikitsumik atuuttussat ajornartorsiortitsisartut

Killilersuutit assigiinngitsut piffissami sivisunerusumi atuuttussaanngikkaluartut, silami arsamik pissartanngorniunnissamut KAK pilersaarusioruminaatsitsivoq. 

Kingullertigut killilersuutaasut, assersuutigalugu ulluni 14-ini qanermut assiaquteqaqqusaaneq amerlanerpaamillu 20 katersuussinnaatitaanerat pilersaarusiorniarnermi ajornartitsisarput, siulittaasoq nassuiaavoq.

- Malittarisassat sivikitsuinnarmi atuutsinneqartarnerat pissutigalugu pilersaarusiorniarneq ajornartarpoq. Taamak sivikitsigisumik atuuttussaatillugit piffissamut sivisunerusumu pilersaarusiorsinnaanngilagut. Unammersuarnerit suut qaqulu ingerlanneqassanersut aalajangerniartarneri ajornartarpoq, Finn Meinel nassuiaavoq.

KAK-imit neriuutigineqarpoq, piaarnerpaamik Nunatsinni Pissartanngorniuttoqarumaartoq. 

- Neriuutigaarput aggustimi septembarimiluunniit Nunatsinni Pissartanngorniuttoqassasoq. Qinnuteqarsimavugut, sulili akissutisinngilagut, Finn Meinel oqaluttuarpoq. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER