Kajumissutsiminnik ujaasisut 200-t Maja ujarpaat
Arnaq ilinniarnertuunngorlaaq Qaqortumi maqaasineqartutut nalunaarutigineqarsimavoq. Arfininngornerup unnuaani kingullermik attaveqarsimasoq ilisimaneqarpoq, qangali kingullermik takuneqarsimanersoq ilisimaneqarani. Innuttaasut 200-t sinneqartut kajumissutsiminnik ippassaq ujaaseqataapput.
Qaqortummi innuttaasut 200-t sinneqartut illoqarfiup qeqqani tissaluttumi sapaammi unnukkut nalunaaqutaq 20.00 naapipput.
Arnaq inuusuttoq 20-t missaanni ukiulik, Maja Heilmann, arfininngormalli ujaarineqalerpoq. Kingullermik attaveqarfigineqarmat arfininngornerup unnuaaniuvoq.
Naja Motzfeldt kajumissutsimik ujaasisoqarnissaanik ippassaq aaqqissuussaqarpoq. Taanna oqaluttuarpoq maqaasineqartumut ilaqutaalluni.
- Assut attortippunga, aamma tuppallernarpoq inuit taama amerlatigisut ikiuutaajartormata. Naatsorsuutigisimanngikkaluarpara taama amerlatigisut takkunnissaat. 200-t missaanniipput, Sermitsiaq.AG-mut oqaluttuarpoq.
Ujaasinermut atatillugu Facebookimi quppernermik pilersitsisoqarpoq atserlugu "Efterlysning af Maja Heilmann". Gruppimi nassuiarneqarpoq maqaasineqartup atisai suunersut. Gruppi maannakkut 1.561-inik ilaasortaqarpoq.
Ujaasineq ingerlateqqinneqassaaq
Kalaallit Nunaata Politiivisa pigaartui Sermitsiaq.AG-mut ullaap tungaa ilisimatitsipput arnaq inuusuttoq suli maqaasineqartoq. Qanga kingullermik takuneqarsimanersoq suli qulakkeerneqanngilaq, kingullermilli arfininngornerup unnuaani attaveqarfigineqarsinnaasimavoq.
Qaqortumi innuttaasut Maja Heilmannimik unnugu ujaaseqqissapput.
Naja Motzfeldt ilisimatitsivoq ujaasineq tissaluttup eqqaani aallarteqqissasoq.
- Kajumissutsimik ujaaseqqinnissamut aaqqissueqqissaanga. Naluara qanoq amerlatigisut unnugu peqataajumaarnersut, maannakkummi siallilerami, Naja Motzfeldt oqarpoq.
Taanna oqarpoq ualimut 16.00 innuttaasut ujaasinerat aallarteqqinneqassasoq.
