Tammaarsimaarneq
Kajumissutsiminnik sulisut nunarsuarmit tamarmeersut Nanortalimmi tammaarsimaartitsissapput
Kajumissutsiminnik sulisut 17-it Kalaallit Nunaanneersut, Canadameersut, Ruslandimeersut, Tyrkiameersut, Frankrigimeersut, Tuluit Nunaanneersut Danmarkimeerseullu illoqarfiup meerartaanut 450-inut tammaarsimaartitsissapput
Ukiut pingajussaa tulleriisiinnarlugu Foreningen Grønlandske Børn, Mellemfolkeligt Samvirke/ActionAid Danmark suleqatigalugit, aasaanera tammaarsimaartitsivoq - kajumissutsiminnik sulisunik nunarsuarmit tamarmeersunik ikiorteqarluni.
Ukioq manna Nanortalimmiipput, tassani illoqarfiup meerartai inuusuttortaalu qaammat ataaseq aasaanerani akeqanngitsumik sammisaqartinneqassallutik.
2014-imi tammarasimaarneq ingerlanneqarpoq Qaanaami, aappaaguanilu Ittoqqortoormiini ingerlanneqarluni.
Camp Nuan
Tammaarsimaartitsisut tassaapput tammaarsimaarfimmi pisortat marluk Qaqortumeersut Ittoqqortoormiineersullu, siunnersorti Ilulissaneersoq, praktikkertut/mentees marluk Qaanaameersut Ittoqqortoormiineersullu, kajumissutsiminik sulisoq Nuummeersoq, Finlandimeersut marluk, Ruslandimeersut marluk, Danmarkimeersut pingasut, Canadameersoq ataaseq, Tyrkiameersoq ataaseq, Frankrigimeersoq ataaseq assiliisorlu Tuluit Nunaanneersoq.
Sapaatip akunnera qaangiuttoq kajumissutsiminnik ikiuuttut marluk Danmarkimit tikissapput suliniullu ´The Future Belongs to US´ atorlugu meeqqat assiliinermik sammisaqartissavaat kingorna atuaganngortitassamik.
Sammisassat akeqanngitsut
Ukiuni siuliinisulli illoqarfimmi meeqqanut inuusuttunullu tamanut ataasinngornermiit tallimanngornermut nalunaaqutaq 12.00 - 18.00 akeqanngitsumik sammisaqartitsisoqartassaaq. Meeqqanut ilaatigut sammitinneqassapput qalipaaneq, titartaaneq, Legonik ikkussuineq, fimoliliorneq, piinnersaasiorneq allarpassuillu. Sammisaqartitsinerit aallartissapput ataasinngornermi juulip 11-anni.
Unnuk kulturisiorfik
Arfininngornerit tamaasa illoqarfimmiut pisoqartitsinermut qaaqquneqartassapput. Taamaasilluni arfininngorpat juulip 9-anni unnukkut kulturisiortitsisoqassaaq.
Tassani illoqaerfimmiut kajumissutsiminnik sulisut nunaminnit nerisassaataat misilissinnaavaat, nunat paasisaqarfigalugit kiisalu kajumissutsiminnik sulisut ilisarisimalerlugitr.
Kajumissutsiminnik sulisut atuarfiup kollegiaani najugaqassapput, sammisaqartitsinerillu ingerlanneqartassapput atuarfimmi silamilu.
Meeqqanut 450-inut
– Neriuppugut illoqarfiup meerartaasa 450-it ilarpassui peqataasassasut. Kajumissutsiminnik sulisoqarpugut meeqqanik angajoqqaavinillu naapitsinissaminnik qilanaartunik aammalu pinnguarnermik, nipilersornermik timersornermillu sammisaqartitsinerit aallartinnissaannut qilanaartunik, Gunver Justesen, Foreningens Grønlandske Børnimi suliniummut pisortaq, tusasgassiorfinnut nalunaarutikkut nassuiaavoq.
Tamatuma saniatigut Gunver Justesenip oqaartigaa suliniummut atatillugu Kommune Kujallermit tapersersorneqarluarsimallutik.
Nanortalimmit siusinnerusukkullu tammaarsimaartitsinermit assit ataani takukkit.
Sermitsiaq.AG ukiuni siuliinisulli tammaarsimaarnermit assinik ataavartumik ilanngussisassaaq.