Kajumissutsiminnik sulisut
Kajumissutsiminnik sulisunut tamanut qujanaq
Naalagaaffiit Peqatigiit ippassaq, decembarip ulluisa tallimaanni, nammineq kajumissutsiminnik sulisartut ullorititaannut atatillugu Timersoqatigiit Kattuffiata, Meeqqat Inuunerissut aamma Arctic Winter Games 2916-ip nammineq kajumissutsiminnik suliaqartut naleqassusiat oqariartuutigaat
Sammisaqarnermik ingerlatsiviit angisuut pingasut, 2016-ip tungaanut atuuttumik kajumissutsiminnik sulisorpassuarnik atugaqartut, isumaqatigiissuteqarput kajumissutsiminnik sulisut suliaasa qanoq naleqartiginerat saqqumisinnerulerniarlugu. Tamanna AWG2016-iip tusagassiorfinnut nalunaarutigaa. Sammisaqarnermik pingasut tassaapput Kalaallit Nunaanni Timersoqatigiit Kattuffiat, Meeqqat Inuunerissut aamma Arctic Winter Games2016.
– Ukioq 2014-imi nammineq kajumissutsiminnik suliaqartut Qaqortumi, Nuummi, Sisimiuni Ilulissanilu 160-ip missaanniittut pikkorissarsimavagut. Illoqarfinni tikitatsinni tamani erserpoq nammineq kajumissutsiminnik suliaqartut qanoq annertutigisumik kivitsinersut. Naapitagut tamaasa nunatsinnilu taamatut suliaqartut allat periarfissaq una atorlugu annertuumik qujaffigerusuppagut, tusagassiorfinnut nalunaarummi allassimavoq, taannalu sammisaqarnermik ingerlatsiviit pingasut sinnerlugit AWG2016-imi pisortap tullianit Arnakkuluk Jo Kleistimit nassiunneqarpoq.
– Qilanaaqaagut 2015-imi suli illoqarfiit allat tikinnissaannut allatullu nunatsinni nammineq kajumissutsimik suliaqarnerup suuneranik qanorlu pingaaruteqartigineranik saqqummiussisarnissatsinnut. Taamatut immikkut sammisaqarnerput uatsinnut assut ilikkagaqarnarpoq malunnarporlu aamma tapersersorneqarluartoq, sammisamik ingerlatsiviit pingasut allapput.
Tallimanngornermi decembarip tallimaani GIF, MIBB AWG2016-ilu ataatsimoorlutik Nuummi pisoqartitsilaassapput. Pisoq pillugu immiussamik assinillu suleqatigiit saqqummiussiumaarput nittartakkatigut Facebookikkullu.
Annertunerusumik paasisaqarusukkuit uunga attaveqarit: Arnakkuluk Jo Kleist, arnakkuluk@awg2016.org, 547854.