Nuummi kajumissutsiminnik sulisut, kaffenik, thenik, sioraasanik, iffianik, qallersuutinik, equutissianik allanillu pisariaqarsinnaasunik sisamanngornermi ualikkut katersipput pisariaqartitsisunullu unnukkut agguaallutik.

Aaqqissuisut tallimanngornermi ullaakkut ilisimatitsipput ilaqutariit katillugit 145-t sisamanngornermi unnukkut pajunneqarsimasut. Ilaqutariit meerartallit ikiorneqarnissaat salliunneqartarput. Ilaqutariit pajunneqartut siorna 107-iupput.

Arnaq Grønvold:

Leiff Josefsen

- Nalunnginnakku pisariaqartitsisoqartoq pajuppunga. Ilaqutariiulluta pisiniutissatsinnik katuussivugut, taava ernutara pisiniaqatigaara pajoqatigalugulu maanga. Ikiuutilaarsinnaanera nuannaarutigaara, Arnaq Grønvold, ernuttani tallimanik ukiulik ilagalugu pajuttoq oqaluttuarpoq.

Ikiuussinnaatilluta ikiuutta

John Thorsen, kajumissutsiminnik ikiuunnissamut aaqqissueqataasartoq oqaluttuarpoq katersuiniussineq ukiut pingajussaat ingerlanneqartoq. Ukiut tamaasa pajugutissat amerliartorneri qujamasuutigaa.

- Ikiuussinnaatilluta ikiuuttassangatta. Ilaatigut nalunarsinnaasarpoq ikiuunniaraluarluni qanoq alloriaqqaarsinnaanissaq. Suliniuterput ukioq manna aamma iluatseqqimmat nuannerpoq, qamuuna pilluarneq malugisinnaavara, Sermitsiaq.AG kajumissutsiminnik suliaqartunut sisamanngornermi ualikkut alakkaammat, John Thorsen oqaluttuarpoq.

Nammineq misigisimagaa

Kajumissutsimik suleqataasoq, Larsine Efraimsen, nammineq anaanaavoq, pissatikilliorsinnaanerlu aamma nammineq misigisimavaa.

Larsine Efraimsen:

Leiff Josefsen

- Uanga anaanaavunga, meeqqallu allat kaallutik innartarsinnaanerat isummama artungajappaa. Nammineq anaanatut pissaarutilivinneq misigisareerpara, maannali pissaqarluarluta, kaannata innarsinnaalereerpugut, taamaattumillu ullumi sulinnginnera atorluarlugu kajumissutsimik maani suleqataavugut. Pisinnaatilluta tunniussaqarsinnaaneq pingaaruteqaqaaq, Larsine Efraimsen, ernini Nuka-Aqqaluk arfineq-marlunnik ukiulik ilagalugu suleqataasoq oqaluttuarpoq.

Jonathan Isbosethsen nulialu Stella Olsen kajumissutsimik suliaqarnermik ukiuni arlalinni misilittagaqareerput, meeqqanullu arsarnermik ilinniartitsisarsimallutik akissarsiaqaratik:

Leiff Josefsen

- Qaqortormiuugallaratta kajumissutsinnik nammineq sulisareerpunga. Ikiuussinnaatillunga ikiuukkusuppunga. Uannut isumaqaqaaq maaniissinnaagama ikiuullungalu, Jonathan Isbosethsen oqarpoq.

- Kajumissutsimik suliaqarneq inuuninni ilaaginnalernikuuvoq. Qaqortumi kajumissutsimik sulisareerpugut, maannalu Nuummut nuunnikuulluta. Maani kajumissutsimik suliaqarsinnaaneq periarfissaariarmat aggerpugut. Suliniut ajunngilluinnarpoq, Stella Olsen oqarpoq.

Helene Josefsen:

Leiff Josefsen

- Soqutigigakku maani kajumissutsimik suleqataavunga. Januar qaammat aamma takisuupilussuuvoq, pajuttuileruttalu ikiuutissat ilaqutariinnut aamma iluaqutaassaqaat. Nuannaarpunga pilluarlungalu maaneeqataasinnaangama.

Katersortarfik, Brugseni aamma Pisiffik/KK Engrosilu pajuttuinissamut tapeeqataapput. Inuit namminneerlutik aamma tapiissuteqarput 19. januarimilu pajuttuineq kajumissutsimik ikiuuttunit ingerlanneqarluni.

Angajo Lennert-Sandgreen, aaqqissuusseqataasoq ilisimatitsivoq kajumissutsimik ikiuukkusuttumit Facebookimi quppernerup ilisarnaatissaa aamma suliarineqarsimasoq.

Nutaarsiassat

Kommunip paaqqinnittarfiini atuarfiup kingorna ornittakkanilu sulisut pikkorissartut

Nuummi paaqqinnittarfinni kiisalu atuarfiup kingorna ornittakkani sulisut ilinniagaqarsimanngitsut piginnaanngorsaqqinneqarnertik sapaatit akunnerisa qulinganni aallartippaat....

Innuttaasunik suliffeqarfinnillu sullissineq pitsaanerusoq

Qatserisartut Sermersuup innuttaasut suliffeqarfiillu  ajornannginnerusumik upalungaarsimasunut attaveqartarnissaat kissaatigivaa.

Nalinginnaasunik apeqqutissaqaruit imaluunniit...