Kajumissaarut: Paatsooqatigiittarnerit pinngitsaaliissumik angerlarsimaffiup avataanut inissiinermik kinguneqartartut
Meeqqat kalaallinik angajoqqaallit paatsooqatigiittoqarnera pissutigalugu pinngitsaaliissumik angerlarsimaffiup avataanut inissinneqarsinnaasarput, peqatigiiffik Mentor Immanuel taamatut isumaqarpoq. Peqatigiiffimmit Kalaallit Nunaannut tunngasutigut Ataatsimiititaliaq pumaffigineqarsimavoq, ajornartorsiummik erseqqinnerusumik misissueqqullugu.
Oqaatsitigut paatsooqatigiinneq aamma kulturit assigiinngsissutaat pissutigalugit, Danmarkimi kalaallit meerartaat oqartussanit pinngitsaaliissummik angerlarsimaffiup avataanut inissinneqarsinnaasarput.
Peqatigiiffimmi Mentor Immanuelimi siulittaasoq Karen anke Petersen, kalaallit Danmarkimiittut pisortanut attaveqarniarneranni ikiuuttartoq isumaqarpoq.
Peqatigiiffik taamaammat sapaatip akunnerani kingullermi Foketinngip Kalaallit Nunaannut tunngasutigut Ataatsimiititaliaanut pulaarsimavoq, politikkerit qanoq iliuuseqarnissaannik kaammattoriartorlugit:
- Kissaatigaarput meeqqat kalaallinik angajoqqaallit qassit pinngitsaaliissummik angerlarsimaffiup avataanut inissinneqarsimanersut pillugit kitsisinik nutaajunerusunik pissarsisinissarput aamma kisitsisinik taakkunannga ingerlaavartumik pissarsisarnissarput. Taamaalillutami ajornartorsiut malinnaaffigisinnaalissagatsigu, Karen Banke Petersen Sermitsiaq.AG-mut oqqarpoq.
Sumiginnaasoqarnerani iliuuseqartoqartassasoq
Siulittaasup erseqqissaatigaa, sumiginnaasoqassagaluarpat pisortat iliuuseqartarnissaat matumani pineqanngitsoq:
- Paasisinnaalluarpara sumiginnaasoqartillugu iliuuseqartoqartussaanera, tamannali siumut isummiuteriikkat malinnagit inuppalaartumilli ingerlanneqartussaavoq, Karen Banke Petersen oqarpoq.
Karen Banke Petersen peqqqissaasutut ilinniagaqarpoq, ajutoorsimaninili pissutigalugu piffissami sivisuumi danskit aaqqissuussaassusaat malillugu isumagineqartarluni.
Ilaatigullu misigisaq tamanna tunngavigalugu, kalaallit allat oqartussanut attaveqartarniarneranni ikiortarniarlugit isumassarsisimavoq, peqatigiiffillu Mentor Immanuel aallartissimallugu.
Tapiiffigineqarnissamik aningaasaateqarfinnut qinnuteqarniartoq
Suliniuteqarnini aqqutigalugu kalaalerpassuit meeqqaminnik arsaagaasartut misigisarsimavaa, Karen Banke Petersenilu isumaqarpoq, sullissinerit ilaannikkooriarluni naammanneq ajortut, aamma angajoqqaat kalaallisuinnaq oqaasillit Danmarkimilu oqartussat paatsooqatigiittarnerannik tamanna tunngaveqartartoq.
- Isumaqarpunga siunnersuuterput politikkerinit tigulluarneqartoq, taamaammat neriuutigaara arlaannik susoqassasoq, Karen Banke Petersen oqarpoq.
Peqatigiiffik kalaallit Danmarkimiittut ikiorserneqartarnissaat anguniarlugu aningaasaateqarfinnut tapiissutissanik qinnuteqarniarpoq.