Kajumissaarut: KGH-mi eqqarsartaaseq taamaatinneqarli

Nutaaliorniarutta aamma KGH-mi eqqarsartaaseq taamaatinniarutsigu, aallarnisaasut pisariaqartinneqarput, Air Greenlandimi pisortaq taama isumaqarpoq.

Peqatigiiffinnit kalaallinik aallarnisaasunik tapersiisunit sinniisut pingasut. Saamimmit Mads Lumholt, Visit Greenland, Susanne Høegh, Arctic Circle Business aamma Allan Chemnitz, Greenland Business.

Jesper Hansen

pingasunn 11. sep 2019 07:47

Annonse

- KGH-mi eqqarsartariaaseq, tassa periusissiani allaqqasut kisiisa suliarineqartarneri taamaatittariaqarpagut, Air Greenlandimi pisortaq, Jakob Nitter Sørensen taama isumaqarpoq.

Nukigap Aarhusimi Inuussutissarsiortunut ulloqartitsinerani ataasinngornermi videokkut peqataagami taama kajumissaaruteqarpoq. Air Greenlandimi pisortaq ataatsimiinnermut najuulluni peqataasinnaasimanngilaq, kisianni video aqqutigalugu peqataavoq.

Inuussutissarsiornermi pisortaq Palle Frederiksen, Kommune Kujalleq, aamma Poul Erik Frederiksen, South Greenland Boat Charterimit Nanortalimmit, kujataani aallarnisaasunut soqutiginninneq naammagisimaarluarpaat.

- Kalaallit nutaaliortuaannarnikuupput. Silaannatsinni inuuniassagaanni tamanna pissusissamisoorpoq – taamaattumillu aamma ingerlaqqissaqqaarnerput ilimagaara, pisortaq, Fonden for Entreprenørskab Kalaallit Nunaanni siulittaasuusoq taama nassuiaavoq.

- Aallarnissaasunik KGH-mi eqqarsartariaatsimik annertuumik allannguisitsisinnaasunik pisariaqartitsivugut. KGH-p nalaani unammilleqatigiittoqanngilaq, sunalu tamarmi periusissani allagaavoq. Maanna taamaakkunnaarnikuuvoq, tassami inuiaqatigiinni unammilleqatigiiffiusuni inuuvugut, tassanilu atuisunik naammagisimaarinnittunik pilersitsiniaraanni kiffartuussinermi saniatigut iliuuseqartoqartariaqarpoq.

Aallarnisaasunut tapersiineq

- Aallarnisaasut pissutsinik naammagisimaarinninnginnertik ilisarnaatigaat, kisianni pissutsit pitsaanerusunngortinnissaannik ilungersuussaqartuupput. Taamaattummillu aallarnisaasut aamma nutaaliorumatuut tapersersornissaat pingaaruteqartorujussuuvoq, Jakob Nitter Sørensen, ataatsimeersuarnermi taama saqqummiivoq.

Pisortaq Brian Buus Pedersen, Sulisitsisut, pisortaq Jørn Holbech, DGH-Aarhus aamma tuniniaanermut pisortaq Jan Bager, DC-Supply, Qajaq Beerimit immiaaqqat usserpaat.

Scenemi saqqummiissoqarnerata saniatigut aallarnisaasunut ataatsimiititsineq annertooq, kalaallit aallarnisaasut, aningaasaliisinnaasut aamma ilisimasallit oqaloqatigiinnissaannut periarfissiivoq.

Ataasinngornermi ualikkut programmi akunnerup ataatsip missaani unitsinneqarpoq, taamaalilluni oqaloqatigiinnissamut aamma aallarnisaasut tunisassiaannik misileraanissamut periarfissaqarpoq.

inuussutissarsiutit