Kajumissaarut: Inuit innarluutillit inissaqartissigit

Marita Jessenip inuiaqatigiinni tikilluaqquneqanngitsutut misiginini qatsulluinnarpaa. Taanna isumaqarpoq inuiaqatigiinni aaqqissuussaaneq inunnut innarluutilinnut tikilluaqqusinngitsuusoq. Nammineersinnaassuseqarusuppoq, nunatsinnilu atugassarititaasut pitsaanerulersikkusullugit.

Takorlooriaruk pisortaqarfimmut sanaartukkamulluunniit arlaannut isilerlutit. Matu ammarsinnaanngilaq. Sila qanoq ikkaluarpat, qanorlu tuaviortariaqartigigaluaruit, sulisup matumik ammaassinissaa utaqqisariaqarpat. Sulisup matu ammarpagu aatsaat isersinnaavutit. Aninialeruit aamma sulisup matumik ammaassinissaa utaqqeqqaartariaqarpat.

Pissutsit taama ittut, Marita Jessenip 28-nik ukiullip ilisarisinnaalluarpai.

Ilisimatusarfimmi isumaginninnermi siunnersortinngorniarluni semesterit tallimassaat atuarpoq.

Marita Jessenip niua saamerleq ukiut arfinillit matuma siorna kipineqartariaqalersimavoq, taassumallu kingorna matut matoqqasut naammattoortuartalersimavai. Namminermi ammarsinnaanngilai. Kørestolerpoq, matullu tigummivikkut qissallaaqqaarluni ammarneqarsinnaasut, ullut tamaasa naammattoortarpai.

- Inissiamut, suliffeqarfimmut, politeqarfimmut, pisiniarfinnut, kigutileriffinnut ilinniarfeqarfinnullu matut. Innarluuteqarpunga, matullu nerukippallaarpata isersinnaanngilanga. Tummeraqarpat aamma isersinnaanngilanga, allakkiamini allappoq.

Allakkiani inunnut attuumassuteqarsinnaasunut, tassa Namminersorlutik Oqartussani naalakkersuisoqarfinnut tamanut, inatsisartuni ilaasortanut tamanut, kommuninut tamanut ilinniarfeqarfiillu ilaannut kiisalu tusagassiorfinnut nassiuppaa.

Inissaqartitsigitsi

Marita Jessen Sermitsiaq.AG-mut erseqqissaavoq nammineersinnaassuseqarumalluni. Nammineq ilinniartut inaanni ineqarpoq. Sapinngisanilu tamaat inuiaqatigiinnut tunniussaqarsinnaarusuppoq, nammineerusullunilu

- Ulluinnarni unammillernarnerpaasartoq tassaavoq sanaartukkanut nammineerlunga isersinnaasannginnera. Sanaartukkallu matuata silammut ilummulluunniit ammarneqarsinnaanera apeqqutaaneq ajorpoq. Matummi tugummiviata tigunissaa inornartarpoq. Taava imminut qaangertutut misigalunga inuit nalusaqqinnaakka aperisariaqartarpakka ikioqqullunga, oqaluttuarpoq.

- Tarnikkut ikilerneqaqqasutut misiginartarpoq, allatuulli periarfissaqannginnama.

Avatangiisit inunnut innarluutilinnut pitsaanerulerlik

Marita Jessen allakkiamini arlalinnik apeqquteqarpoq. Inuiaqatigiit pisussinnaappata, oqalussinnaappata, tusaasinnaappata isigisaqarsinnaappata tassa naammappa?

Taassuma erseqqissarpaa inuit innarluutillit ulluinnarni unammilligassarpassuaqartartut, illoqarfiullu kiisalu sanaartukkat iserfigineqarsinnaasut aporfissarpassuaqartartut. Cafenut neriniartarfinnullu neriartornissaq inornangajappoq, kisimiillunilu niuerniarnissaq aamma aporfissarpassuaqarpoq.

- Taavami isumaginninnermi siunnersortitut suliffeqaleruma? Matui nammineq ammartagassaassanerpat? Imaluunniit meerartaaruma, matui aamma taamaassapput. Pisiniarfiilluunniit iserfigerpiarsinnaanngilakka, Marita Jessen allappoq.

Taamaammat oqartussanut, politikerinut inuiaqatigiinnilu akisussaasunut allanut piumasaqarpoq, inuit innarluutillit aporfeqaratik tikilluaqquneqartutullu misigalutik ingerlasinnaanissaat inuunissaallu piumasaralugu. Inuit allat assigalugit, nammineerluni ingerlasinnaarusuppoq.

- Suliniutit kinguarteqattaarneqartut tusaasinnaallugit misiginarporluunniit ikiligaaqqilluni. Ersarippoq tikilluaqqusinnginnerat innarluutilinnut. Tikilluaqqusisimagunimmi qangaammalli suliarereersimassagaluarpaat, oqarpoq.

Mittarfeqarfiit

Inuit innarluutillit pisinnaatitaaffii pillugit suliaqartoq Tilioq assigusumik piumasaqaqqammerpoq, tassa mittarfiit iserfigiuminarnerunissai piumasarigamigit. Tummeqqat amerlavallaaqaat, inuillu innarluutillit mittarfeqarfinni akunnattoorfeqaratik ingerlasinnaasanngillat.

Marita Jessenip ajornartorsiut ilisarisinnaalluarpaa, erseqqissarluguli ajornanngitsumik ingerlaarsinnaaneq sumi tamani killeqartoq.

- Aap, ilisarisinnaalluarpara. Elevatoreqannginnera ajornartorsiutaavoq. Matullu aamma namminneq ammarsinnaanngillat. Eqqaamasarpara aamma quiartorluni naammagittarnartartoq. Majuartarfippassuaqarpoq. Naak biilinik aallertaraluartut aamma nammineernissamut periarfissat killilerneqarnerat pisinnaatitaaffinnut unioqqutitsineruvoq, Marita Jessen nassuiaavoq.

Powered by Labrador CMS