Nuussuineq
Kajumissaarut: Eqqumiitsuliornermut ilinniarfiup nuunneqarnissaa nalilersoqqinneqarli
Eqqumiitsuliornermik ilinniarfiup Nuummiit Aasiannut nuunneqarnissaa Naalakkersuisut pilersaarutigaat. Kisianni eqqumiitsuliortut kattuffiata EPI-p tamanna isumassarsiatsialaannginnerarpaa
Ilinniarfeqarfiit nuunneqarnissaannut Naalakkersuisut pilersaarusiuleruttorput, Nuummi Eqqumiitsuliornermik Ilinniarfik ilanngullugu.
Naalakkersuisut ilinnniarfik Aasiannut nuutsinniarpaat.
Nuussineq tulluanngitsoq
Kisianni eqqumiitsuliortut kattuffiannit, Eqqumiitsuliornikkut Pinngorartitsisut Ingerlatsisullu (EPI), isornartorsiorneqarput. Kattuffiup ilinniarfiup Nuummiiginnarnissaa neriuutigaa.
- Ersarissumik eqqumiitsuliortuniit kattuffimmiillu siorna apriilimi oqariartuutigineqareersimagaluarpoq eqqumiitsuliornermik ilinniarfiup Aasiannut nuutsinniarneqarnera akerlerineqartoq. Naak siammasinnerusumik suliffeqarfinnik ilinniarfinnillu Naalakkersuinikkut siunertaq nammineq qulaatigut kusanartuugaluartoq, eqqumiitsuliornermik ilinniarfiup nuutsinneqarnissaanut tulluanngilaq, EPI-mi siulittaasoq, Inunnguaq Petrussen, tusagassiuutinut nalunaarummi allappoq.
Eqqumiitsuliortut avatangiisiminnit sunnerneqartarput
Aasianni eqqumiitsuliornerup ineriartortinneqarnissaanut EPI ajorinninngitsoq, taassuma oqaatigaa.
- Nuummilu suliffeqarfinnik ilinniarfinnillu eqiterunneq politikkikkut inuillu isumaanni akerlerineqartoq paasisinnaagaluarlutigu, massakkut eqqumiitsuliortunngorniartut illersortariaqarpagut. Eqqumiitsuliortoq avatangiisiminit annertuumik sunnerneqartarpoq isumassarsiortuullunilu, Inunnguaq Petrussen erseqqissaavoq.
Naalakkersuisunut kajumissaarut
EPI-mi siulittaasup oqaatigaa, eqqumiitsuliortunngorniat katersugaasivimmi isumassarsiorsinnaanerat, katersugaasiviullu toqqorsiviani misissuisinnaaneq, eqqumiitsuliortut Katuami saqqummersitsisartorpassuit orniguffigineqarsinnaasarneri, tusarnaartitsinerit eqqumiitsuliornikkullu allarpassuit takussutissat sunnertiffigineqarsinnaasartut.
- Pingaarnertullu aamma eqqaaneqartariaqarpoq eqqumiitsuliortut nuummiittut amerlammata, taakkulu eqqumiitsuliornermik ilinniarfimmut pulaartuartarput isumassarsiorfiungaarlutillu ilinniartumut annertuumik nalilimmik. Taakkuuppullu pulaartutut ilinniartitsisuusartut suleriaatsinut assigiinngitsunik sammisaqartitsinermi.
- Naalakkersuisut kaammattorpagut eqqumiitsuliornermut ilinniarfiup nuunneqarnissaa nalilersoqqeqqullugu, Inunnguaq Petrussen oqarpoq.