KAIR terminalip illutassaa pillugu suleqateqalersoq
Qaqortumi mittarfissami terminalip illutassaanut tamakkiisunut sanaartugassanut akigititassanut isumaqatigiissuteqarnissaq siunertaralugu, ataatsimoorluni sanaartugassamut pilersaarusiornerup ingerlanissaa pillugu suleqatigiinnissamut isumaqatigiissut Kalaallit Airports Domestic-ip aamma MT Højgaard-ip atsioqqammerpaat.
Qaqortup timmisartoqarfissaani mittarfiliortussamik qangali pissarsisoqareeraluartoq, terminalit illutassaanik sanaartortitsinissaq tusarliunneqarsimanngilaq.
Maannali tamanna pillugu nutaarsiasssaqalerpoq. Kalaallit Airportsimimiimmi Facebookikkut nalunaarutigineqarpoq suleqatigiinnissamik isumaqatigiissummik atsioqatigiissimasut.
Qaqortumi timmisartoqarfissap illutassaanik sanaartornissaq siunertaralugu suleqatigiinnissamik isumaqatigiissuteqartoqarpoq.
2023-mi isumaqartigiissuteqartoqarnissaa naatsorsuutigineqartoq
- Qaqortumi terminalip illutassai sanaartugassanut akigititassanut isumaqatigiissutit angisuut, mittarfiliornerni pingasuusuni amigaatigisatta, kingullersaraat. MT Højgaard-imut suleqatigiinnissamut isumaqatigiissutip tamatuma inissitsinnissaanut qaninnerulersippaatigut, taamaattumik tamanna nuannaarutigaarput, Aviaaja Karlshøj Knudsen tusagassiorfitsigut nalunaaruteqarnermi oqarpoq.
Kalaallit Airportsimit sanaartugassanut akigititassanut isumaqatigiissutip inaarutaasup 2023-mi naammassineqarsimanissaa naatsorsuutigineqarpoq. MT Højgaard Nuummi imarpik ikaarlugu angalasartunut mittarfissami terminalit illutassaanik, kiffartuussivimmik tårnemillu sanaartornissamik isumaqatigiissuteqarfigineqareersimavoq. Ingerlatseqatigiiffimmi pisortaanerup suliassat isumagineqarnissai qilanaaraa:
Suleqartigiinnissamut qilaaartoq
- Suliassaq annertuujuvoq pissanganarlunilu. Aallaqqaataaniilli peqataanissatsinnut aammalu suliassap pitsaanerulersinnissaanut ilaatigut Nuummi suliassamit misilittakkatta annertuut atorluarnissaannut, isumaqatigiissutip taassuma periarfissippaatigut. Aamma Qaqortumi Kalaallit Airports-ip suleqatigilluarnerata ingerlateqqinnissaa qilanaaraarput, MT Højgaard Grønlandimi pisotaaneq Torben Nielsen oqarpoq.
Ilulissani timmisartoqarfissap illutassaanik sanaartortussatut KJ Greenland isumaqatigiissuteqarfigineqarsimavoq.
Qaqortumi Timmisartoqarfissap 2025-p qiteqqunnerani suliaralugu naammassineqarnissaa atuutsinneqalernissaalu pilersaarutaavoq. Canadami suliffeqarfik Pennecon mittarfliortussaaavoq.
Qaqortumi timmisartoqarfissaq aningaasaqarnikkut tatineqarsimasoq
Sermitsiaq.AG-mit illutassat sanaartorneqarnissaannut sooq suliariumannittussarsiuussinermi isumaqatigiissuteqartoqarsimannginnera Kalaallit Airportsimut oqaaseqarfigitinniarneqarpoq.
KAIR-imi pisortaanerup ukioq-manna siusinnerusukkut nalunaarutigaa, illutassanik sanaartornissaq missingersuutit iluini ingerlanneqarnissaa naatsorsuutigineqartoq.
Siorna ukiakkut Inatsisartuni politikkerit Qaqortumi suliniut annaanniarlugu iliuuseqarput, tassani Kalaallit Airportsimut immikkut 400 millioner koruuninik politikkerit aningaasaliissuteqarput, taamaalillutillu timmisartoqarfissap en milliard koruunit sinneerlugit akeqarnissaa akuersaarlugu. Tamanna pisimavoq, Kalaallit Airportsip aallaqqaammut missingersuusiarineqarsimasut iluini timmisartoqarfiliortoqarsinnaanngitsoq nalunaarutigimmagu.