KAIR suliamik ingerlatsilluartoq
Nuummi mittarfissap nutaap affaa pilersaarutit malillugit novembarip aallartinnerani atorneqarsinnaalissaaq.
Nuummi timmisartoqarfiliorneq ingerlalluarpoq. Mittarfissap nutaap affaa pilersaarutit malillugit novembarip aallartinneraani atorneqarsinnaalissaaq.
Kalaallit Airports sanaartortuusoq Facebookikkut allappoq, asfaltilersuineq naammassineqartoq aamma teknikikkut qitiusumik atortorissaarutit inissinneqarsimasut.
- Taamaattoq suli suliassaqalaarpoq, taamatullu Trafikstyrelsen-ip taassuma atorneqarsinnaalernissaanut sanaartugaq misissortussaavaa, Kalaallit Airportsimit allapput.
Timmisartut siulliit pilersaarutit malillugit sisamanngorneq ulloq 3. november aallarnerfigalugu tingisinnaalissapput missinnaalissallutillu.
Oqaluttuaannanngulersoq
- Tamaanga killinnissamut suliaq annertoorujussuusimavoq, aammalu suleqatigisat akuutinneqartut tamarmik, ukiorlualinnginnerani killiffik taanna qulakkeerniarlugu annertoorujussuarmik suliaqarsimapput, Kalaallit Airportsimit oqaatigineqarpoq.
Mittarfissap nutaap affaanik atuilernermi mittarfitoqqaq oqaluttuaannanngortussanngorpoq, tassami maanna mittarfik 950 meterisut takitigisoq atorunnaarneqartussaagami.
Mittarfissap nutaap affaa kingulleq naammassineqarpat mittarfitoqaq atorunnaavissaaq.
Mittarfitoqaq 1977-imiit 1979-imut sananeqarsimasoq ukiut 40-t sinnilaarlugit ingerlanneqarnerani takornarianit Nuummilu innuttaasunit tuusintilikkaanit miffigineqartarlunilu aallarfigineqartarsimavoq.