KAIR pisumut ulorianartumut qisuariarpoq: Ajuusaarnarluinnarpoq
Videomi Facebookikkut ingerlaartinneqartumi ujarassuit aqqusinermut ingerlaarfiusumut nakkakaatinneqarnerat pillugu Kalaallit Airport maanna qisuariarpoq. Pisoq ilungersunartorujussuartut tiguneqarpoq, ingerlatseqatigiiffik nalunaarpoq.
Nuummi mittarfiliortoqarnerani pisoq ulorianartoq innuttaasup videoliarisimavaa, videoliarlu maanna Facebookimi ingerlaartinneqarpoq (allaaserisap naqqani takuuk).
Videomi sanaartornermi maskiinap ujarassuit angisuut sivingasukkut nakkakaatikkai takuneqarsinnaavoq, taakkulu ilaat sivingasukkut nakkakaallutik aqqusernup killingani biilit ingerlaarfiata eqqaani unittarput.
Kalaallit Airports (KAIR, sanaartornermik ingerlatsisut, maanna video pillugu qisuariarpoq).
Pisoq ilungersunartutut isigigaat
- Nuummi sanaartornermik suliaqarnermi maskiinat oqimaatsut mittarfiup isuani avannarlermi ujaqqanik innaarsuup sinaatigut kaamisarneqartut, taamaalillutik angallannermi saneqquttut qanitaannut assakaallutik unittartut, videoliarineqarsimanerat allarpassuartuulli inuit attaveqatigiittarfiini takuagut, KAIR allappoq, nangillunilu:
Isumannaallisaanermi sukaterinissaq neriorsuutigigaat
Maannakkut sanaartornermik suliaqartup, suliaqarnerminnut atatillugu isumannaallisaanermi iliuusissanik pilersitsinermut atuutsitsinissamullu akisussaasuusup, tungaanut tamanna malitseqartinneqassaaq, KAIR neriorsuivoq:
- Ingerlaannaq pisariaqartunik iliuuseqartoqarnissaa qulakkiissavarput, taamaalilluni suliaqarneq isumannaatsumik, saneqquttunut isumannanngitsumik ingerlanneqassalluni, KAIR allappoq, taakkulu aamma suliassamut tunngatillugu naapertuuppasinngitsunik misigisaqaraanni, taakkununnga allattoqarnissaanik imaluunniit sianertoqarnissaanut kaammattuivoq.
Ujaqqat nakkaasut videoliarineqarsimanerata uani takutinneqarnissaa Sermitsiaq.AG akuersissummik pisimavoq:
