KAIR-ip ukiumoortumik naatsorsuutai: Ilulissani suliniut kinguaattuulaarpoq
Ilulissani mittarfissualiorneq piffissamut pilersaarusiornermut sanilliullugu ”kinguaattuulaarpoq”. Tunniunneqarnissaanulli piffissaliussaq suli allanngorneqanngilaq, Kalaallit Airportsip ukiumoortumik naatsorsuutaani tamanna ilisimatitsissutigineqarpoq.
Namminersorlutik Oqartussat ingerlatseqatigiiffiutaat alla ileqquusumik ataasinngornermi ataatsimeersuarpoq, tassa Kalaallit Airports Holding (KAIR), Nuummi, Ilulissani Qaqortumilu mittarfiliornernik suliaqartoq.
Ataatsimeersuarnermut atatillugu naatsorsuutillu saqqummiunneqarneranni ingerlatseqatigiiffik sanaartornerit killiffiannik nalunaaruteqarpoq, taakku Kalaallit Nunaata oqaluttuarisaanerani attaveqaasersuutitigut suliniutit annersaattut oqaatigineqarput.
Nuummi sanaartorneq pilersaarutit malillugit ingerlavoq, sulilu 2024-mi kvartalip sisamaanni piareernissaa naatsorsuutigineqarpoq, kisianni Ilulissani ajornartorsiortoqarpoq.
Suliniut ”kinguaattuulaarpoq”, taama oqaatigineqarpoq:
- Ilulissani Munck Gruppen ukioq manna suliaqarnermi mittarfissami qaartiterillunilu allilerinermik suliaqarpoq. Aasaanerani 2022-mi kangerliumanermi avannaatungaaniittumi assaasoqarlunilu sinerissap qulakkeerneqarneranik allilerineq aallartinneqarpoq.
Tunniussinissaq allanngunngitsoq
- Ilulissani sanaartornermik suliniut ajoraluartumik piffissamut pilersaarutaasumut sanilliullugu kinguaattooqqasoq, ingerlatseqatigiiffiup pigisap Kalaallit Airports A/S-imut 2022-mi ukiumoortumik nalunaarusiani ilisimatitsissutigineqarpoq, taamaakkaluartoq tunniunneqarnissaanut piffissarititaq allanngorneqanngilaq, Siulittaasup Naalakkersuisoqarfia KAIR-ip naatsorsuutaasa nassuiarnerini taama allappoq.
Nuummi Ilulissanilu mittarfissuit nutaat 2.200 meterisut takissuseqartut sanaartorneqarput. Qaqortumi mittarfimmik 1.500 meterisut takissusilimmik sanaartortoqassasoq politikerit aalajangerpaat, tassanilu mittarfiup nutaap tunniunneqarnissaa 31. juli 2025-mi pissasoq ullulerneqarsimavoq.
Mittarfiit suli piareerneqanngimmata KAIR suli isertitaqalinngilaq, ukioq mannalu angusaq ingerlatsinermi 149 mio. kr.-nik amigartooruteqarfiuvoq. Aappaagu 238 mio. kr.-nik amigartooruteqarnissaq naatsorsuutigineqarpoq.
Tabelimi ataani ingerlatseqatigiiffimmit kisitsisit pingaarnerit ukiuni tallimani kingullerneersut takuneqarsinnaapput:
Mittarfinnut aningaasaliinerit katillugit 4,9 mia. kr.-iunissaat naatsorsuutigineqarpoq, aningaasalu naatsorsuutit saqqummiunneqarnerat naapertorlugu ima pissarsiarineqassapput:
Aningaasaliinerit amigaataasut 300 mio. kr.-t pillugit aningaaseriviit assigiinngitsut taarsigassarsiffissatut periarfissaasut isumaqatiginninniarfigineqarput.
Mittarfeqarfiit 2023-mi aktiaatileqatigiiffinngortinneqarput KAIR-imullu ingerlatatut ilanngunneqarlutik. Mittarfiit ingerlanneqarnerat ingerlatseqatigiiffimmut ataatsimut kattunniarlugit tamanna pivoq. Tunngaviusumik Kalaallit Airports International, danskit naalagaaffianit piginneqataaffigineqartoq, Nuummi Ilulissanilu mittarfinnik nutaanik sanaartortitsisuuvoq.
