KAIR-ip siulersuisuini siulittaasoq tunuarpoq

Johannus Egholm Hansen Kalaallit Airportsip siulersuisuini ukiuni pingasuni qaammatinilu arfineq-marlunni siulittaasooreerluni tunuarpoq.

Kalaallit Airportsip siulersuisui nutaamik siulittaasortaassapput. Johannus Egholm Hansenimi tunuarniarluni aalajangersimavoq, taanna pingasunngormat tusagassiivik LinkedIn aqqutigalugu allappoq.

- Ullumi nammineq aalajangerpunga Kalaallit Airports Groupip siulersuisuini siulittaasutut tunuarniarlunga, Johannus Egholm Hansen pingasunngormat unnukkut LinkedIn aqqutigalugu allappoq.

Aalajangersimanini allatigut Sermitsiaq.AG-mut oqaaseqarfigerusunngilaa.

Siulersuisuni siulittaasoq tunuarpoq, ingerlatseqatigiiffiup timmisartoqarfiliassaasa ilaasa ataatsip ajornartorsiornerani.

Neqeroortitsineq taamaatiinnarneqartoq

Qaqortumi timmisartoqarfiliornissamut neqeroortitsineq aggustimi taamaatiinnarneqarpo, neqeroorutigineqartut ingerlatseqatigiiffiup aningaasaqarneranut sanilliullugu akisuallaaqimmata.

Tassunga atatillugu siulersuisuni siulittaasup inassutigaa naannerusumik mittarfiliortoqassasoq, tassa sanaartoqneq ingerlatseqatigiiffiup missingersuutaasa politikkerinit atugassiissutigineqartut iluini nammassineqarsinnaassappat.

Siunersuulli tamanna Kujataani politikkerinit naannerusumik mittarfeqarusunngitsunit akerlilerneqarsimavoq. Aappaatigut aamma mittarfissaq pilersaarutaasutut takissuseqartillugu suliarineqassappat Naalakkersuisut aningaasassanik nassaarniaruminaatsitsissapput.

Mittarfinnut tunngatillugu misilittagartooq

Johannus Egholm ukiut pingasut qaammatillu arfineq-marluk kingulliit ingerlaneranni Kalaallit Airportsimi siuttuusimasoq. Nuummi Ilulissanilu mittarfissat nutaat suliaralugit aallartinneqarnissaat suliarisimavaaa.

Inuussutissarsiuteqartoq 2017-imi martsip qaammataani Kalaallit Airportsimi siulittaasunngorpoq. Taamanikkut ukiut 25-t sinnerlugit timmisartoqarfinni ingeniøritullu sulisarnermik misilittagaqareerpoq.

Johannus Egholm Hansen Savalimmiuneersuuvoq, ilaatigullu Savalimmiuniittumi Vágar Airportimi sulisimalluni, tassani 2009-miit 2014-imut siulittaasumut tullersortaasimalluni. Ilaatigut timmisartoqarfiup allilerneqarnerani siuttuusimavoq.

Johannus Egholm Hansen LinkedIn-ikkut allappoq, piginnittut pilersaarumminnik malinnissappata, timmisartoqarfiit sanaartorneqartut Kalaallit Nunaannit aningaasaliissutigineqartut pitsaanerpaartarissagaat.

- Angalasunut, timmisartuutileqatigiiffinnut, umiarsuartigut takornariartitsisartunut il.il. toqqaannartumik iluaqusiisussaaneri kisiat pissutiginagu, aammali suliffeqarfiit Kalaallillu Nunaanni inuiaqatigiit aningaasaqarnerannut toqqaannanngikkaluartumik iluaqutaasussaaneri pissutigalugit, siulersuisuni siulittaasuujunnaartoq.

Siulersuisuni ilaasortat sinnruttut tassaapput:

Christian Berg, siulittaasup tullia

Finn Gaarsmand

Niels Søren Thomsen

Powered by Labrador CMS