KAIR-imit Sermitsiaq isornartorsiorneqartoq: Aningaasaqarnermut tungasunik ernummatiginninneq pillugu qulequtsiussaq ilumuunngilaq
KAIR-imi siulittaasoq Egholm Hansen isumaqarpoq, qulequtsiussaq 'KAIR aningaasaqarnermut tunngasunik ernummatiginnittoq' Sermitsiamut oqaaseqaataanut naapertuutinngitsoq
KAIR-imi siulittaasoq Johannus Egholm Hansen allagaqapallappoq, Sermitsiap 'KAIR aningaasaqarnermut tunngasunik ernummatiginnittoq' qulequtsiullugu ilanngutassiaa atuaramiuk. Ilanngutassiaq Sermitsiaq.AG-mi matumani naalisarlugu saqqummiunneqarpoq.
- Avisip qulequtsiussaa eqqortuunngilaq, Johannus Egholm Hansen tusagassiorfinnut nalunaarummini allappoq, pineqartoq KAIR-ip nittartagaani tamakkerlugu atuarneqarsinnaavoq.
- Tamanit ilisimaneqaleriinnguatsiarpoq, Sermiatsiap aaqqissuisuunera mittarfeqarfissanut akerliulluinnartoq, pineqartullu aviisimi sammineqartarnerani tamanna erseqqilluinnartumik takutinneqartarpoq.
- Aammaarluni aviisip aaqqissuisoqarfiata 2019-imi septembarip
20-ani (2019-imilu septembarip 19-iani nittartakkakkut saqqummiussami) aviisimi qulequtsiussinermigut takutippaa, tusagassiornikkut ataqqinnissuseqannginneq, Kalaallit Airportsip siulersuisuini siulittaasoq isumaqarpoq.
Nuummut sunniuteqangaarnavianngitsoq – Ilulissani immaqa sunniuteqarsinnaasoq
Johannus Egholm Hansenip oqaasii aviisimi imatut issuarneqarput:
- Kangerlussuaq pillugu isumaqatigiissut Nuummi Ilulissanilu timmisartoqarfissat nutaat qanoq ilaasoqartigisinnaanerannut qulalersitsisinnaavoq, taamatulli pisoqarsinnaanera oqaatigissallugu siusippallaarpoq, tamatumani Kalaallit Airports International A/S-imut sunniuteqarnissaanut, timmisartortitseqatigiiffiit Nuummi Ilulissanilu timmisartoqarfissat suliarineqarnerat naammassineqarpata siunissami Kangerlussuarmik qanoq atuitigisarnissaat apeqqutaalluinnarmat.
Oqaaseqaatini tamanna attatiinnarpaa, ilanngulluguli oqaatigaa, Kangerlussuaq pillugu isumaqatigiissut Nuup aningaasaqarneranut sunniuteqangaatsiarnissaa naatsorsuutiginagu.
- Kalaallit Nunaannut Kalaallillu Nunaannit angalasartut tamarmiusut 60%-iisa missaanniittut Nuummut Nuummiillu angalasarnerat eqqarsaatigalugu, aamma Kalaallit Nunaanni silaannakkut angallassinermi angalasartut agguaqatigiissillugit aamma taamak amerlatigingajannerat eqqarsaatigalugu, maannangaaq oqaatigineqareersinnaavoq, Kangerlussuarmi timmisartoqarfimmut tunngatillugu isumaqatigiissut Nuummi timmisartoqarfissamut nutaamut sunniuteqarnissaa ilimananngilluinnartoq, tassa Nuuk aningaasaqarnikkut patajaalluinnartumik tunngaveqarmat.
- Akerlianik Kangerlussuaq pillugu isumaqatigiissut Ilulissani mittarfissap nutaap aningaasaqarneranut annertunerulaartumik sunniuteqarsinnaavoq, tassa timmisartortitseqatigiiffit timmisartuutiminnik takornarianik ilaasulinnik, Kangerlussuarmukartitseriarlutik Ilulissanut ingerlaqqittassappata. Taamatulli angallassinemik aaqqissuussineq angalasartunit piumaneqarnavianngilaq, angalasartummi orniguffissaminnik toqqaagaangamik toqqaannaq timmisartukkut apuunnissartik pingaartilluinnartarmassuk, tamatumunngalu tunngatillugu takussutissaqanngilaq, taamatut sunniuteqarneq suliniutip aningaasalersorneqarneranut tamarmut ajoqutaasinnaanera.
KAIR-imit maana 'isumaqatigiissutip Nummi Ilulissanilu timmisartoqarfissat nutaat ilaasoqarnissamut tunngaviinut sunniutaasinnaasut eqqarsaatigalugit aningaasaqarnikkut kinguneqaataasinnaasunik pisariaqartinneqartumik naatsorsuisoqassaaq.'
Ilanngutassiaq isornartorsiorneqartut tamaat aviisimi Sermitsiami atuarsinnaavat