KAIR-imi siulersuisut nutaamik siulittaasortaartut
Air Greenlandip siulersuisuini maannamut siulittaasuusimasoq Kjeld Zacho Jørgensen, Air Greenlandip siulersuisuinit tunuarluni Kalaallit Airportsip siulersuisuini siulittaasunngorpoq.
Kalaallit Airportsimi siulittaasuusimasoq Johannus Egholm Hansen septembarip qaammataata naanerani atuuffimminit tunuarmat, siulittaasussaq nutaaq Naalakkersuisunit maanna toqqarneqarsimavoq.
Siulersuisuni siulittaasunngorpoq Kjeld Zacho Jørgensen, ulloq manna tikillugu Air Greenlandip siulersuisuini siulittaasusimavoq.
Naalakkersuisut Siulittaasuata Naalakkersuisoqarfiani Ingerlatseqatigiiffinnut Allattoqarfik taamatut ilisimatitsivoq.
Kjeld Zacho Jørgensen taamaalilluni Nuummi Ilulissanilu nutaanik mittarfiliornermi, sanaartorlugit aallartinneqareersuni siuttunngorpoq.
Taakkua saniatigut Qaqortumi mittarfiliornissap naammassillugu suliarineqarnissaa oqimaatsoq isumagisussanngorpaa, Qaqortumi mittarfiliorniarnermut aggustusip qaammataani suliarinnittussarsiuussineq taamaatiinnarneqarpoq.
Danmarkimit akuerineqartoq
Kjeld Zacho Jørgensen ingerlatseqatigiiffimmi Kalaallit Airports Holdingimi aallaqqaammut siulittaasuussaaq, siunertaavorli Kalaallit Airports Internationalimi Kalaallit Airports Domesticimilu aamma siulittaasuussasoq.
Danmarkip naalagaaffia Kalaallit Airports Internationalip ilaanik piginnittuuvoq, naalagaaffillu siulittaasussamik nutaamik akuersisussaavoq.
Danmarkimi aningaasaqarnermut ministeeriaqarfiup Kjeld Zacho Jørgensen siulittaasussatut akuersissutigisimavaa, Ingerlatseqatigiiffinnut Allattoqarfik Sermitsiaq.AG-mut ilisimatitsivoq.
- Siulersuisuni siulittaasumut aningaasarsiaritinneqartartut siunissami 100.000 koruuninik apparneqartussaapput, taamalu 650.000 koruuninngussallutik, Lars Balslev Ingerlatseqatigiiffinnut Allattoqarfimmi pisortaq allappoq.
Lars Balslevip ilisimatitsissutigaa, aningaasarsianik appaanissamut pissutaasoq, siulersuisuni siulittaasut suliarisartagaasa allanngorsimanerat, tassa Kalaallit Airportsimi aqutsisut nukittunerulersimanerat pissutigalugu.
Naalakkersuisut taamammat aalajangersimapput siulittaasup aningaasarsiarisartagai appartinneqassasut.
Air Greenlandip siulersuisuini siulittaasoq nutaaq
Kjeld Zacho Jørgensenip Air Greenlandip siulersuisuini siulittaasutut atuuffini qimappaa.
Tassunga taarsiullugu siulittaasup tullia Bodil Marie Damgaard ingerlatseqatigiiffiup siulersuisuini siulittaasunngorpoq, Peter Grnvold Sanuelsenilu ingerlatseqatigiiffiup siulersuisuinut ilanngulluni.
Peter Grønvold Samuelsen KNI-mi pisortaanertut atorfeqarpoq.