KAIR-imi pisortaq: - Kalaallit Nunaat sipportumik tuniniassanngilarput
Kalaallit Nunaat soqutigineqaqaaq. Nunanit allanit timmisartuutileqatigiit arlaqartut Ilulissanut Nuummullu aqqummut neqerooruteqarnissaminnik soqutiginnipput. Kalaallit Airportsimi pisortap mianersoqqussutigaa mittarfiit nutaat marluk ammarpata takornariat amerlavallaalersinnaanerat.
2024-p naalernerani Nuummi Ilulissanilu mittarfissuit nutaat ammarpata Air Greenlandip sakkortuumik unammillerneqarnissi naatsorsuutigisinnaavaa.
Aviisi Sermitsiaq taama allappoq.
Aallaqqaammulli nunanit tamalaanit timmisartuutileqatigiit mittarfinnut mittalissapput. Mittarfinnut ingerlatseqatigiiffimmi Kalaallit Airportsimi (KAIR) mittarfinnik piginnittuullunilu ingerlatsisumi tamanna anguniagaavoq.
- Timmisartuutileqatigiit Kalaallit Nunaannut timmisartuussinissamik soqutiginnittut tamaasa oqaloqatigerusuppavut. Aamma Norwegian.
Taama Sermitsiamut oqarpoq KAIR-imi pisortaaneq Jens Lauridsen ullumi aviisimi allaaserisamut oqaaseqaatitut, tassalu Norwegianip assersuutigalugu Københavnip imaluunniiit Olsop Kalaallillu Nunaata akornanni aqqummik ammaanissaq soqutigisupilussuugaa ilaasussatigut tunngavissaqassappat.
Norwegianiuppat imaluunniit timmisartuutileqatigiit allat Kalaallit Nunaanni mittarfissanut nutaanut timmerusuttut, piumasaqaataavoq ilaasussatigut tunngavissat ajunnginnerat, oqarpoq.
- Takornariaqanngilaq mittarfik takuniarlugu tikittunik. Misigisaqarusupput, mittarfinnut ingerlatseqatigiiffimmi pisortaaneq oqarpoq.
- Qularinngilara nunanit tamalaanit timmisartuutileqatigiit Kalaallit Nunaat periarfissatut isigigaat. Nuummut Ilulissanullu angalanerit qassiussanerannut pissutsit arlaqartut inissinneqartariaqartut apeqqutaapput, soorlu akunnittarfinni inissat. Suut tamarmik ulikkaarput. Kalaallit Nunaannut angalasut mittarfik takuniarlugu tikinnavianngillat, allarluinnaalli nunap neqeroorutigisinnaasai. Taamaattumik akunnittarfinni inissat amerlineqartariaqarput, Jens Lauridsen isumaqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
