Skip to main content

KAIR akit qaffakkiartornerat pillugu: Imitsinnut isumannaarniarsimavugut

Pisortaanerup naatsorsuutigaa, Qaqortumi timmisartoqarfissap illutassaanik suliariumannittussarsiuussineq missingersuutit iluini ingerlanneqassasoq.

Akit qaffakkiartorneri sanaartornermut sakkortuumik sunniuteqarsinnaapput, aningaasat naleerukkiartornerisigut sanasut isumaqatigiissumminnik malinninnissaq ajornartorsiutigisarpaat, tassa sanaartornermi atortussat, sulisunut aningaasarsiaritinneqartut allallu akisuneruleraangata ajornartorsiutigisarpaat.

Kalaallit Nunaanni sanaartornerit annersaat maannakkorpiaq ingerlanneqarpoq, tassa Nuummi, Ilulissani Qaqortumilu timmisartoqarfiliornerit sanaartornerit annersarimmassuk. Sanaartornerit Kalaallit Airports Holdingimit (KAIR) ingerlanneqarput.

Ingerlatseqatigiiffiup ukiumoortumik nalunaarusiaani Nuummi Ilulissanilu sanaartornermut atatillugu allassimavoq. "atortussat akiisa qaffakkiartornerat imaluunniit kinguaattoornerit matussuserniarlugit missingersuutinik qaangiinerit nalikillineqarnissaat sillimatissatulluunniit immikkoortitsinissaq pisariaqartinneqanngillat."

Aningaasaataajaasinnaanerat naammaginartumik inissisimasoq inerniliunneqarsimavoq.

Sermitsiaq.AG-mit ingerlatseqatigiiffimmut apeqqutigineqarsimavoq, Ukrainemi sorsuttoqarnera pissutigalugu akit qaffakkiartorsinnaanerat eqqarsaatigalugu inuiaqatigiit aningaasaqarneranut ulorianartorsiortitsisinnaanermik naliliisoqarsimanersoq.

Sanasut imminnut aamma isumannaarsimasut

KAIR-p naliliinermini tunngavigisimavaa, ingerlatseqatigiiffiup sanasunut aalajangersimasumik akeqartitsinissamik isumaqatigiissut. Isumaqatigiissutillu sanasut ulorianartorsiortinneruaat, ajornerpaammimmi pisoqassappat sanasut akiliisinnaajunnaarsinnaapput. Sanasulli aamma imminnut isumannaarsimasut oqaatigineqarpoq:

- Nalunngilarput sanasut arlallit sanaartornermi atortussanut arlalinnut isumannaarinnissimasut. Tassa atortussat aalajangersimasumik akeqartinneqarnissaat isumaqatigiissusiorfigisimavaat. Taamaalillutik akiligassaq kinguartinneqarsimalluni, akiligassarli aamma nalimmassarneqarsinnaavoq, Kalaallit Airports Holdingimi pisortaaneq Jens R. Lauridsen oqarpoq, nangillunilu:

- Ilumoorpoq aalajangersimasumik akeqartitsinissamik isumaqatigiissusioraangatta, sanasunut isumaqatigiissutip kingunerlussinnaanera. Sanasulli nalinginnaasumik taamatut aamma isumaqatigiissusiortarput. 

Qaqortumi suliariumannittussarsiuussinermi missingersuutit malinneqarnissaat naatsorsuutigineqartoq

KAIR Qaqortumi timmisartoqarfissap illutassaanik sanaartortussamut isumaqatigiissutissamik suliaqaleruttorpoq, Suliariumannittussarsiuussinermi atortut sanaartortussatut piukkunneqartunut pingasunut nassiunneqaqqammeræput.

Kujataani timmisartoqarfiliornissamik suliniut ajutoorfiusimavoq, paasinarsimmat missingersuusiarineqarsimasut iluini piviusunngortinneqarsinnaanngitsoq, politikkerilli ukiakkut aningaasanik amerlanerusunik pissarsimmata suliniut ingerlaqqilesimalluni.

Ukioq manna siusinnerusukkut aalajangiunneqarpoq, Canadami sansut mittarfiliussasut, maannalu timmisartoqarfiup illutassaanik sanaartortussamut isumaqatigiissuteqarnissaq kisinngorulluni.

Apeqqut: Neqeroorutigineqartut missingersuusiarineqarsimasut iluanniinnissaat KAIR-imit qanoq periarfissaqarsorineqarpat?

 - Soorunami pissutissaqarluarpunga qanoq akeqartitsisoqarnissaanik ilisimasaqannginninnut. Naatsorsuutigaarpulli illutassanut missingersuusiarineqarsimasut malinneqassasut. Siorna upernaakkut illutassat suliariumannittussarsiuunneqarput, tassunga atatillugu isumaqarpunga akit qaffakkiartornerat neqeroorutinut ilanngunneqareersimassasut. 

Realkreditobligationinut aningaasaliissuteqarsimasut

- Suliarinninnissamik neqeroorutaasimasoq maanna suliaraarput, sanaartornissarlu pillugu sanasumik aasap ingerlanerani isumaqatigiissuteqarnissarput anguniarlutigu, Jens R. Lauridsen oqarpoq.

Naatsorsuutini atuarneqarsinnaavoq, aningaasaatit sinnerisa ilaat realkreditobligationinut aningaasaliissutigineqarsimasut. Erniat qaffakkiartornerisa malitsigisaannik obligationit nalingi maannakkorpiaq appariartorput, tamatumali KAIR eqqornavianngikkaa, pisortaaneq nassuiaavoq:

- Obligationit naatsuaqqat pisiarisarpavut. Tassa obligationit pisiarisavut atorunnaangajalersuupput, taamalu kurs 100-mut akilersinnaallutigit, Jens R. Lauridsen oqarpoq.

Ingerlaseqatigiiffimmit oqaatigineqarpoq, obligationit annaasaqaataalaarsinnaasut, aningaasalli aningaaserivimmi erniaqartinneqannginnerannit annaasassat annikinnerussasut nassuiaatigineqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER