Kaammattuutit: Uummannamut imermik nassiussisoqarli
Avannaani illoqarfimmi imermik amigaateqartoqarnera pissutaalluni iliuuseqartoqartariaqartoq innuttaasoq kiisalu Inatsisartuni ilaasortat marluk kaammattuipput
Uummannami imeq uuliamik mingutsinneqarnera pissutaalluni illoqarfimmi innuttaasut imermik pisariaqartitsilluinnarput.
Uummannamut imermik nassiussisoqartariaqartoq innuttaasoq kiisalu Inatsisartuni ilaasortat marluk kaammattuuteqarput.
Ikiorneqarnissamik pisariaqartitsilluinnartut
Nuummit Pakkutaq Joelsen Sermitsiaq.AG-mit oqaloqatigineqarpoq. Taassuma innuttaqatini ikiorusuppai.
- Iliuuseqarfigipallakkusunnarpoq. Imissaqartitsisoqannginnera pissutaalluni ilaqutariit meerartallit suliffeqarfiutillillu eqqugaapput. Ikioqatigiissinnaaneq piaartumik pingaartippara, taamaattumik suleqatigiissinnaanissaq pingaartippara. Inissisimanerat erloqinarpoq, nammineq aamma takorloorsinnaanngilara qanoq issanersoq taamatut inissisimassanerlunga, oqarpoq.
Oqaluttarfimmit kaammattuut
Uummannami innuttaasut ikiorneqartariaqartut Siumumit Hermann Berthelsen Inatsisartuni oqaluttarfimmit Naalakkersuisunut kaammattuuteqarpoq.
Aleqa Hammond (NQ) Inatsisartut ataatsimiittarfiannit aamma ima oqarpoq:
- Uummannami imissaaleqineq ajunaarnersuartut isigineqartariaqarpoq. Imissaaleqisoqarnera pissutaalluni meeqqat atuariartorsinnaanngillat aamma aalisakkerivik matoqqatinneqarpoq.