Kaammattuut: Avannaata Qimussersuani ulloq unnuarlu nakkutilliisoqartalerli
Avannaata Qimussersuaqartoqareerneani pinerliinerit arlallit naammattoorneqarput, taakkulu kingunerisaanik qimussimik unammersuartoqartarnerani qimmit ulloq unnuarlu nakkutigineqartalernissaanik kaammattuisoqarpoq.
Inuit kikkuuneri ilisimaneqanngitsut qimminik qimuttunik nerukkaarujussuartut. Qimmeq teriarsuarnut toqunartutortinneqarsimagunarluni toqusoq. Ajugaagaluartullu ajugaaneranik atuutsitsiunnaarneq. Avannaata Qimussersua ukioq manna ingerlanneqareersorlu, pisut mamianarsinnaasut tamakkuupput.
Pisoq kingulleq tassaavoq qimussertartup qimmii, inummit ilisimaneqanngitsumit, unamminersuarneq sapaatip akunnera ataatsimik sioqqullugu, nerukkarneqarujussuarsimasut. KNR maajip aallaqqaataani taama allaaserisaqarpoq.
Ulloq unnuarlu nakkutilliisut
Tamakku pillugit Doris J. Jensen qisuariaateqarluni allagaqarpoq. Taanna isumaqarpoq Avannaata Qimussersuaqartoqarnerani qimmit ulloq unnuarlu nakkutigineqartalissagaluartut, assigusunik pisoqaqqeqqunagu.
- Avannaata Qimussersuani illersuisuulluni assorujussuaq ilungersunarpoq paasillugu, qimminut
pinerliiniartoqarsimaneranik uumasut nakorsaat pasitsaassaqartut. Taamaammat sukkanniuunnissat
nalaanni qimmit ulloq unnuarlu nakkutigineqartarnerat siunissami isumannaatsumik
qulakkeerneqartariaqartoq Avannaata Qimussersuani illersuisutut isumaqarpunga, Doris J. Jensen allappoq.
Ukiut tamaasa qimmit 800-nik ikilisartut
Suliniutip Qimmeq Projektip misissuineri kingulliit naapertorlugit qimmit qimuttut ukiut tamaasa 800-nik ikileriartarput. Avannaani Tunumilu qimmit qimuttut ullumikkut 15.000-it missaanniipput, tassa ukiut 20-t ingerlanerinnaani 50 procentimik ikileriarsimallutik.
- Qimmip qimuttup piujuaannartinnissaa illersornissaalu politikkikkut tapersersussallugu aatsaat taama
pingaaruteqartigaaq, Doris J. Jensen allappoq. Taanna ilanngullugu allappoq qimmit qimussernermilu piorsarsimassuseq attatiinnarumallugit politikkikkut tapersiisoqartariaqalersoq.
Aammattaarli Kalaallit Nunaanni Qimussertartut Kattuffiat, KNQK, kaammattorpaa qimmit qimuttut piujuaannarnissaanut suliniuteqarlutik unammersuarnerup nalaani nakkutilliisoqartalernissamik suliniuteqaqqullugit.