Politik
Kaaleeraq M. Andersen Siumumiit tunuarpoq
Siumukkormiu inuusuttoq piffissami siviisumi eqqarsareerluni partiimit tunuassalluni aalajangerpoq. Partiimilu suli pilersinneqarsimanngitsumi Inatsisartunut qinigassanngortissamaarpoq
Politikkeri inuusuttoq oqallisigiineqartoq, Kaaleeraq Møller Andersen, ullumikkut ulloq 2 oktoberimi atuutilersumik Siumumiit tunuarpoq, taanna tusagassiuutinut nalunaarummi paasissutissiivoq.
Piffissami sivisuumi eqqarsaasersuutigereerlugu, aammattaaq massakkumut pisut nalilersoreerlugit Siumumiit tunuarniarlunga aaliagerpunga, Kaaleeraq Møller Andersen allappoq.
Inatsisartunut qinigassanngortinniartoq
Ukiup tulliani partii Siumut tunuliaqutarinagu Inatsisartunut qinigassanngortissamaarnini, ilanngullugu paasissutissiaraa.
- Tulluarsorinngilara siulittaasoq (Kim Kielsen aaqq.) isumaqatiginagulu qineqqusaassaguma, Kaaleeraq M. Andersen Siumut politikkiminik aallussinngitsuunerarlugu, oqarpoq
Kaaleeraq M. Andersenip Kim Kielsen kaammattorsimavaa, Nunatsinni namminiilivinneq qaqugu anguneqassanersoq ulluleeqqullugu. Aammattaaq isumaqarpoq Siumut namminiilivinissamut qulartunngorsimasoq.
Aamma atuaruk:
Partii suli pilersinneqanngitsoq
- Ukiup tulliani Inatsisartunut qinersisoqalerpat partii suna tunuliaqutarissamaarpiuk?
- Partii suli pilersinneqanngilaq, Kaaleeraq M. Andersen Sermitsiaq.AG-mut oqarpoq, Qujaukitsullu partiiliassaa pineqarnersoq oqaatigerusunngilaa.
Aamma atuaruk:
Namminiilivinnissamut qularneq
- Massakkut Siumut partiinngorsimavoq naalagaaffinngornissamut qularluni, uanga suliniutimma aammalu sorsuusuutigisamma pigaarutillit ilagilluinnarpaat Nunarput namminersortoq. Utaqqiinnarsinnaajunnaarpugut aammalu nalornilluni oqaatsit kusanartut tunuanni timitaqanngittumik sulineq peqataaffigisinnaanngilara, Kaaleeraq M. Andersen oqarpoq.
Tusagassiuutinut nalunaarummini naqissuserpaa, partii Siumup 1977-imi pilersinneqarami anersaava piumassuseqarneralu maqaasillugit, tassalu namminiilivinnissamik kissaateqarneq.