Kaagiliornermik nuannarisallit Mette Blomsterbergimik tupaallatsitsisut
Qaqortumi kaagiliornermik nuannarisallit 15-it missaanniittut sapaatiummat kaagiliortartutut tusaamasaq dommereralugu kaagiliornermik unammisitsisisoqarmat peqataapput. Kuannimik kaagiliaq immussuartalik ajugaassutigineqarpoq.
Kalaallit kaagiat, halloween kaagi kaagilu immussuartalik kaagiliarineqartut ilagaat. Inuit kaaginik suliarilluakkanik ussiiartorlutik DR-p aallakaatittagaani 'Søde Liv'-imi isiginnaarneqartartoq ilassiartorlugu takkussuussimapput.
Mette Blomsterbergip kaagit tamaasa usserpai, kuannimillu kaagiliaq immussuartalik normu 1-itut toqqarlugu.
- Atsaat siullermeersumik kuannimik kaagiliorama immussuartalimmik ajugaanissara naatsorsuutigisimanngikkaluarpara. Mette Blomsterbergip oqaluttuaraa, naasutalinnik kaagiliorneq nalunarluinnartartuusoq. Pikkorinnerarlunga oqarmat tulluussimaaqaanga, ajugaasimasoq Tukummeq Mølgaard oqarpoq.
Ajugaasoq Inuilimut ilinniariartorluni Narsamukartoq Sermitsiaq.AG-mit oqaloqatigineqarsimavoq.
Kaagi immussuartalik paarnartalillu
Alla kalaallit kaagiannik paarnartalerlugu kaagiliorsimasoq normu 2-nngorpoq. Kaagiliortartumik nuannaartorinnittoq Nancy Jensen normu 2-nngorami tupaallassimaqaaq.
- Qanoq oqaaseqarnersorluunniit eqqaamanngilara. Tupaallallungalu nuannaaqaanga. Kaagiliannik ussiisoq takullugu uppernanngingajapporluunniit. Unammisunut peqataarusullunga kaagi sanavara. Normu 2-nngornissara ilimagisimanngikkaluarpara.
- Kaagi sinaatigut aamma ajulaarami kusassangaatsiarsimavara, Nancy Jensen nuannaaqisoq oqarpoq.
Nancy Jensenip mikisunnguullunili innaraangami 'Det Søde Liv' isiginnaartarsimavaa, Mette Blombergimillu naapitsigami puigunngisaannagassaminik misigisaqarsimavoq.
Unamminermi halloween kaagi normu 3-nngorpoq. Bertha A. Hansenip kaagiliaa.
Blomsterbergip Kiara aqqanilinnik ukiulik pikkugilluinnaraa
Kiara Lund Olsen unammisuni 15-iusuni nukarlersaavoq. Hinbærmousse aamma sukkulaat makronillu akoralugit vanilje kaagiliorniarluni nammineq isumassarsiarisimavaa.
- Unammeqataalluni nuanneqaaq. Ippassaq unnukkut ajanga ikiortigalungu kaagi aallartippara. Taamaammat ulapilaarsimavugut. Mette Blombergi takullugu nuanneqaaq, oqaluttuuppaangalu pinnerlungalu pikkorissuusunga, Kiara Lund Olsen Sermitsiaq.AG-mut oqarpoq.
Kiarap arnaata Pipaluk Lund Olsenip oqaluttuaraa, Kiara ukioq manna februaarip 20-ani nammine cafeearassaminik sanasimasoq, aamma mikisunnguullunili qanoq kaagiliortoqartarnersoq youtubekkut isiginnaarlugu nuannarisarsimagaa.
- Mikisunnguullunili kaagit assigiinngitsut atortullu tuluttut taasinnaasalerpai. Unammisoqarneranut peqataanera takullugu nuanneqaaq, Mette Blombergilu tupaallatserujussuarpaa. Mette Blombergip taamak inuussutsiginera ilisimasimannginnamiuk. Tulluutseqaatigut, Pipaluk Lund Olsen oqarpoq.
Mette Blomsterbergip tikeraarnera kaffillernermik naggaserneqarpoq, peqataasut tamarmik 250 koruunit nalinginut pisiutissanik tunissutisinneqarput.